قبل ما تصيد فالكونطرا أنابيك ANAPEC أجي تفهم أشنو هي

اجي تفهم :لانابيك والكونطرا ديالو واش فمصلحتك ولا لا ؟
لي ماكيعرفش الانابيك هي واحد المؤسسة عمومية عندها استقلال مالي وتحت تأطير وزارة الشغل
والهدف والدور ديالها هو إنعاش التشغيل..
هاد الآنابيك كتلعب دور الوساطة بين المشغل وبين الشخص لي باغي يخدم..
يعني بحال السمسار - غايدبروا للشركات على العمال وياخدو التسمسيرة ديالهم
كولشي كيعرف أنه كاينين كونطرات فالعمل.. ولي هما:
CDD:
ولي هو عقد محدود المدة.. مثلا ملي كيبغي يخدمك كيقولك را غانديرو فالكونطرا غير خمس شهور مثلا وملي تكمل عاد غادي نعاودو نجددوها..
وكيكونو فيها بزاف ديال الالتزامات بالنسبة للمشغل.. ولي منها
CNSS - ASR - CPS
CNSS: هي الصندوق الوطني للضمان الاجتماعي.
ASR: لاصورونص
CPS: التعويضات
.
CDI:
ولي هي كونطرا أو عقد غير محدود المدة.. يعني ملي كيديرو معاك المشغل ماكيحددش المدة لي غاتسالي فيها الكونطرا..
وكيكونو فيه التزامات بحال لاخور .. غا هو ماكيتفرق غا بالمحكمة..
يعني عقد مريكل نيت.. ولا سنيتيه راك لصقتي بيديك ورجليك
.
CATD:
وهذا عقد ديال إنجاز شي مهمة..
كيتحدد فيه الوقت والمكان ونوعية العمل..
وفيه حتى هو التزامات مفروضة على المشغل ومنها داكشي لي ذكرنا فالكونطرات لولين نيت. .
هادشي كامل زوين وفصالح العامل يعني نتا ملي كتبغي تخدم هادشي فالصالح ديالك..
آرى اسيدي هادشي مابقاش عاجب صحاب الكروش الكبار لي شادين كاع البروجيات الكبار فالمغرب
حيت طبعا كيكلفهم بزاف ديال الفلوس باش يخلصو كاع دوك الالتزامات..
ناضو اسيدي وبما أنهم هما المسؤولون وهما لي كيديرو القوانين..
خرجو لينا هاد الآنابيك..
لي هي عبارة عن أكبر مشكلة للشباب..
ولي كيقولك بلي نتا ملي غاتاخذ الديبلوم ديالك وتخرج تخدم..
راك ماشي موظف ولا أجير.. بل نتا غير مجرد سطاجير..
غير هو سطاجير وكتخلص والخلصة كتبدا من 1600 حتى ل 6000 درهم.
وهاد الكونطرا نعاماس كتلغي ليك ديك
CNSS - ASR - CPS
وكيجيبو ليك واحد اللعيبة جديدة ولي هي:
AMO
كاتبان بحال الشعارات لي ف Netflix - HBO
ولي كتعني التغطية الصحية الاجبارية..
زائد كتعفى من الضريبة على الدخل ههههه بحالا زعما كيخلصوك ب 4000 درهم 🤦♂️
والشركة لي دخلتي ليها كتعفى من داكشي لاخور لأنها ماكتبقاش تخلصو عليك طبعا.. زائد كتعفى حتى من الضريبة المهنية..
.
هاد الكونطرا ديال الانابيك الى خدمتي بيها مع شي شركة لمدة كتقل على 6 شهور وخرجتي..
فراك كتعاود تستافد منها مرة اخرى الى بغيتي تخدم مع شركة اخرى..
أما الى بقيتي خدام معاهم اكثر من 6 اشهر وخرجتي فراه هزك الما ماغاتعاودش تخدم بيها مرة اخرى..
وغايخصك لي يخدمك بكونطرا من دوك الانواع لي دكرنا من قبل..
وطبعا حتى واحد ماغايبغي يخدمك نيشان بدوك الكونطرات ومايستافدش من كونطرا انابيك..
.
وغالبا المشغل لي كيخدمك بهاد الكونطرا كيقولك سنيها وكيدير فيها عاامين..
اييه عاامين غاتبقى غير مجرد سطاجير كيحرث عليك وكيدخل على ظهرك اللعاقة..
وحتى تكمل ديك عامين عاد كيدير معاك كونطرا من دوك الكونطرات لي قلنا قبل..
ولكن !
راك وخا درتي معاه كونطرا انابيك عامين يقدر يجري عليك فأي لحظة..
حيت فالقانون الدولة كتفرض على المشغل يخدم 60% من الناس لي كانو خدامين معاه بكونطرا آنابيك..
و 40% الباب الاحباب..
يعني احتمال كبير تكون من بين دوك 40%
ووخا كاع ماتكونش من ديك 40% غايلقاو ليك شي سبة ويجريو عليك ويعاودو يديرو نفس البلان..
وهاكا الشركة ديالهم كتبقى تستافد من الانابيك وكتحرث على الشباب وتستغلهم..
داكشي علاش معظم الشباب كيبعدو من القطاع الخاص وكيبغيو يمشيو للقطاع العام..
لمهم هادشي كامل قلناه غا باش تستافد وتعرف شنو كاين.. حيت هادشي ماكيقولوهش ليك.

[@mohamedkabbouri3182]

يسلام كون كانو غ بحال هد فيديوهات في اليوتوب كن مبقاتش عندنا التفاهة و بنادم غيكون واعي.

[@7ikayah]

هذا هو الهدف ديالنا هو نحاريو التفاهة

[@abdocooking7391]

التفاهة كتحيد مباشرة منين كنعمروا الفراغ بالمفيد .مثلا الكاس خاوي عامر بالهواء كنعمروه بالماء كيخرج الهواء. وشكرآ على المجهود المبذول.

[@OmarOmar-sy4yw]

وراه اليوتوب عامر بقنوات التعليمية ولكن كحل رأس مباغيش اوعى باغي تفاهة او رتيني اليومي.

[@oumaimarouguig5807]

@@7ikayah خويا انا كنت في واحد مدينة تحولت مدينة اخرى بغيت ندير المدينة لساكنة فيها دابا مبغاتش تبدل ليا شنو حل

[@ouakkaayoub]

صحيح اخي ناس خصها تشجع المحتوى الهادف

[@inassinas5070]

هاذ الكونترا أنابيك خص الشباب يتجمعو ويديرو عليها شي مضاهرات باش تحيد إلى بغاو يخدمو

[@thekingvlogs91]

Wayh bssah

[@sar-ymine7417]

فعلا

[@redrachid8325]

ههههههه كارفور دارو ليهم تمنية وتلاتين الف ريال وتسيني معاهم كونطرا انابيك عامين من بعد ماقالو ليهم ست شهر سطاج وضربو بيهم العداب ديال الافتتاح في مدينة برشيد وماعطاوهمش البريمات بزاااااف عيب

[@abdoalssyade4261]

يكفي أن جميع الشباب ما يخدموش بيها وغادي تنقرض بوحدها

[@amineelmoussaid457]

خوت الله يحفظكم انا حاط ضوسي ديالي عندهم واش يمكن ليك نسحبو من عندهم و حاجة ثانية الى كان ممكن اني نسحبو يعني مبقيتش داخل فلكونترا ديالهم ؟؟

[@asmapink4901]

الله اجعل شرح ديالك كصدقة جارية لك يوم العرض ♥️

[@zakaria_culer]

الله يرحم الوالدين ، أول فيديو غنتفرج فيك ، محتوى يستاهل بزاااااااااف التشجيعات ، الله يسر ليك ❤❤❤

[@mariammarina8822]

شكراً بزاااف خويا على هاد القناة كتوضح لينا فيها بزاف الحوايج وبفضل الله وفضلك غنقدرو نتجنبو بزاف ديال الحوايج لي مامنهاش

[@mohammedlamine236]

بارك الله فيك اخي الكريم شكرا بزاف على هاذ المعلومات ..اللهم زدنا علما

[@progamer9028]

الحمد لله كاين ربي عز وجل شحال ديال المشاكل وقعوا لينا ف يامات anapec او الله سبحانه وتعالى تدخلات قدرتوا رزقك ماغايحيدوا ليك حتى واحد .

[@relaxingmeditation3346]

احسن حاجة الواحد يفكر كي يدير ديالو و يجمع ديبلومات الخدمة عند ناس كتبقى مدلة .. شكرا اخي 🙏🙏🙏

[@skynation4032]

مع كامل احترامي لرأيك، لكن جمع الديبلومات و العمل عند الشركات هو إن لم يكن باستمرار و بشكل دايم و مستمر حسب حالة كل فرد منا، فهو بالعكس كسب تجارب و صقل العمل و كسب مهارات وخبرات نافعة لكل فرد من أجل تطوير الذات و تكوين علاقات ستعود على الفرد بالنفع، لا نجاح بدون كد و صبر و اجتهاد

[@relaxingmeditation3346]

@@skynation4032 صحيح اختي التجارب مهمة جدا ف تكون كفاءة المقاول او شخص عموما لكن الانسان خاص يعيش و يحقق الاكتفاء الداتي ديالو و يركز على حوايج اخرين من غير انه يبقى ف نفس الروتين عند ناس

[@Amina-fk3xf]

تبارك الله عليك، شرح مبسط و مفهوم

[@medgabsent9615]

برافوا عليك أخويا فيديوا أكثر من رائع حفظك الله

[@mariamthanksforyouaboutall3139]

الله يجعل كل حرف قلته اخي لتنوير الشباب في ميزان حسناتك، وادعو الله ان يرزقك مزيدا من التألق في كل خطوة تخطوها.

[@ahmaderami7183]

جزاك الله خير الجزاء اخي الكريم حفظك الله ورعاك

[@user-rd3zv6ks3c]

ههههه جنب الحيط خاي الشرح نتاعك Top عاد عرفت منين ندخلهم دابا الله ينورك خويا

[@niamahassane8942]

هاذا هو المحتوى لي كنت كنقلب عليه بفارغ الصبر بسبابك ماشاء الله قدرت نفهم بزاااف ديال الحوايج لي كنا غافلين عليهم او لي كانو من حقنا . شكرا بزااف على المجهودات لي كدير باش تصنع محتوى شيق او مفيد .👏👏👏👏👏

[@morocconow2672]

'

[@farahty94]

شكرا بزاف كتفيدنا انت صراحة لي خاص توصل للملايين المشتركين شكرا بزاف

[@adoado5784]

جزاك الله خيرا أخي الكريم و شكرا جزيلا لك👍♥

[@user-df8sg4bf8q]

الله يرضي عليك على يوم كنت غنوقع الكونطرا ونتصيد بلااااان هذا العز

[@azizouammi4813]

محتوى رائع كنستافدو منك بزاف أخاي الله انورك راك غادي مزيان ❤️

[@fatimamahnken1236]

تبارك الله عليك ،الله يحفظك ويكثر من امثالك

[@meriemkorir4290]

🙂 الحمد لله شفت الفيديو قبل ما ندير هاد الكونطرا شكرااا بزاف ❤‍🩹

[@marawalouda5742]

أول فيديو نتفرج ليه فاليوتيوب كاامل⁦❤️⁩⁦❤️⁩

[@7ikayah]

😍❤️❤️❤️

[@soufianefaouzi5726]

برافو عليك شرحتي لينا بواحد طريقة زوينة وبكول برودة

[@7ikayah]

شكرا لك اخي الكريم ومرحبا 🌹🌹

[@mohamedsimo5286]

شكرا على هاد المعلومات أخاي الله ينورك

[@bougrineyuba3253]

انسان راقي مواضيع هادفة برافو عليك صديقي😎👏

[@Mahayplus]

تبارك الله عليك موضوع رائع جدا💙💙

[@7ikayah]

مرحبا اخي مهاي

[@soufianebouaoud9099]

الله يحفظك لينا شرحك واعرة ماشاءالله دير لينا فيديوهات الربح من شيحاجة بدون راس المال

[@aminaelamraoui3021]

تستحق المتابعه وكلامك كل صحيح..

[@Mouhssin995]

خويا براڨو عليك كمل فهادشي الله يسهل عليك 👍✌️

[@IHYA01]

تبارك الله عليك أخي شرح في المستوى 👍

[@noursafia9836]

تبارك الله عليك الموضوع مفيد طريقة شرح روعة 👍👍

[@7ikayah]

مرحبا اختي الكريمة 🌹

[@khadijaajja5918]

​@@7ikayah khoya chhal 3ndk lha9 tsniha mn mera ?!!wach ila snitiha mera whda kaywali 3ndk mochkil apres ila bghiti tsni cdi ola cdd ?!!?

[@sa3idasa3d54]

شكرا الأخ بحال هاد فيديو ليبغينا نستافدو

[@gffgabdelhafid4584]

جزاك الله خيرا أخي الكريم على كل هذه المعلومات المفيدة للمجتمع

[@service-maintenance]

هديك هي عملية اعادة تدوير العمال ناس كيدرو اعادة تدوير للنفايات وهدو كيديرو ديك للعملية لبنادم

[@youneselbounayi5998]

الله يعطيك ماتمنيتي ♥️ الله يفتح عليك شكرا بزاف

[@kardihanane5206]

Khoya afak ana dkhlt ch7al hadi odrt inscription f site dylhom o db bghit nsupprimer compte dyli 3ndhom wach mkynch chiw7d 3rf kifach ? O wach ila knt drt inscription hadchi ty3ni nhar nbghi nkhdem aytle3 lihom z3la fach khdama wib9a itatb9 3liya dkchi dylhom

[@youneselbounayi5998]

@@kardihanane5206 فالحقيقة معرفش أختي ولكن منطقيا راكي تقدري تسحبي داكشي وتبقاي تخدمي بدون كونترا أنابيك ، عاوتاني ملي الشركة كتخدمك هي لي كتقول لك واش كونترا أنابيك ولا عادية إيلا گالك واش عندك حساب فلانابيك فراه غالبا غدي يبغي يعطيك ديال لانابيك حيت هدي ساهلة ومافيهاش لخسارة بالنسبة ليهم ، ويلا شي حد عارف كتر مني سوليه يجاوبك نشاء الله وبالتوفيق.

[@kardihanane5206]

La ana mamsinya ta contrat w asln mzl tn9ra ghir msjla f site dylhom obghit nsupprimer compte dyli 3ndhom om3rftch kifch

[@nezhaprof4236]

تحية وشكرا لك على هذه التوضيحات اذ كنا نجهلها.

[@haitamfarik4776]

هذا هو كلام الحق حول هذه المؤسسة...موفق

[@user-qh9ln1sj6h]

شكرا اخي على الشرح الكبير

[@7ikayah]

هدفنا إفادتكن مرحبا 👋 ♥

[@Semkala.Youssef]

تبارك الله على سي سفيان🤛🤜

[@7ikayah]

مكاين غا القاسح ا سي يوسف

[@user-fl6ik1ht6y]

برافو عليك خويا شرح رائع تحياتي

[@fatiimzi5474]

أول مرة نصادف القناة ديالك تبااارك الله عليك ،محتوى رائع .

[@malakmourad2083]

موضوع هادف 👍 بالتوفيق🌹

[@7ikayah]

بارك الله فيك اختي الصغيرة 🌸 🌹🌷

[@imanimn8021]

عندك حق شبرنا دبلوم كنمشو انابيك مكيعملو معك تا شي حل مابقاوش حتا يعطو وقت ناس حط سيفي ومشي بحالك خدامي كيدوزوها بيناتهم وحنا كيسردوك لكبلاج وتمارة كحلة

[@mehdiouchane9677]

شكرا بزاف أخاي كنت غادي نتقولب تبارك الله عليك

[@abdelaatihennane5981]

جزاكم الله خيرا وبارك فيكم ❤

[@BlueRese]

I'm definitely going to subscribe to you ❤️ you're different

[@zidanemockadam4926]

الله يحفظك ❤

[@7ikayah]

🤗🤗🤗🌷

[@pariselectro]

مشاء الله ❤❤❤ اخير لقيت شي حد تشرح امور هامة

[@mohamedamrani7359]

وضحت الأمور شحال هادي كنا في حاجة لي يقول لينا هاد الشي سعى فات الفوت شكرا لك على النصيحة

[@khadijalahcen1872]

الدولة خاصها تحمي المستخدمين. عشنا حتى شفنا شباب عندو إجازات فشعب علمية وخدامين ب 3000dh فالقطاعين الخاص والشبه عمومي. أما السطاجات شهور بدون أجرة مانهضروووش.

[@user-ql8rv2vs2b]

وحتى الشعب الادبية اختي واخدين فيها ديبلومات وماهمتميينش بديبلوماتنا وحتى حنا الادبيين عيينا وقرينا من نيتنا

[@olivermerth5179]

وعلاش الاجازة في الشعب الادبية سهليتها !! هههههههههههه راه الى كانو الطلبة كايفاليديو في الشعب العملية سهل التأكد من نتائجهك واش تظلمو في التنقيط أو لا .. يعني النقط واضحة ، راه طلبة لأداب يعيى مايقرا أو تقرا يجي أستاذ يقول ليه ماعجبنيش جوابك و تعبيرك و طريقتك في الكتابة .. الخ يعني صعب تحصل على الإجازة في للآداب عكس في الشعب العلمية للي الطلبة كايتبعو قواعد و معادلات و نظريات و دروس تطبيقية ... حسب تجربتي فيهم بجوج

[@asmaeka2174]

الضريبة على الدخل ماشي هي TVA ولكن IR للي هي اختصار ديال IMPÔT SUR REVENU

[@abdellahabdoussalam8953]

IGR

[@nassima1698]

Taxe valeur ajoutée

[@mohamedkraimaa111]

شكرا على الموضوع 💝

[@chaimaavi7229]

Bravo 3lik bnadem yikhdam fchihaja dialo hsan mn had lmousiba

[@majdouline04]

شكرا على الفيديو👍شرح مبسط واش بصح انابيك اذا لقات لك خدمة فدومين ديالك او مع شي شركة كتقتطع لك من صالير ديالك كل شهر واحد قدر مالي؟ 0:47 اش قلتي اخاي؟!😒

[@wahedmnlko7elisback62]

انابيك هي انعاس الشغل ماشي انعاش الشغل كما يدعون ، الاخوان خاص كلشي يتجمع باش نديرو وقفة رجل واحد تحت كلمة وحدة انابيك اررررحل

[@majdouline04]

انعاس كومة كاع و لاهيلا😅الواقع المبكي المضحك🙄 مكينش معامن كن بنادم يوقف وقفة رجل واحد واهلي كن شحال من حاجة تقادات فهاذ البلاد بلهلا يثبتوا لهم كيقهروك بالشفوي ودير غا مظاهرة على أرض الواقع تلقى راسك بوحدك كتغوت فحال حمق! لا حياة لمن تنادي الرجاء في الله🌼هو الرزاق الله اكبر واعظم منهم كاملين أحسن حاجة بنادم يدير شي مقاولة ولا شي مشروع وخا يكون صغير ويبقى طالع بشوية بشوية والله يجيب التيسير ان لكل انسان ما سعى🌼

[@soukainalakhdar3227]

لانابيك داروها باش يشجعوا الشركات انهم يخدموا الناس و شحال من شركة كتلخد الناس من انابيك،فاش كيكون شي بروفيل مزيان را كيبدلو ليه الكونطرا و كايبقا معاهم و الله يوفقنا أجمعين

[@wahedmnlko7elisback62]

@@majdouline04 صلي على النبي اول حاجة فاش كايبغيو شي شركة يدخلو بنادم و لقيتي شي اوفر الى كنتي ديجا خدمتي بكونطرا انابيك كايحرمو عليك الخدمة حيت ديجا خدمتي بيها ،يعني هوما كل مرة كايدخلو غير لي عمرو خدم بيها و لي فايت خدم يضرب راسو مع الحيط

[@wahedmnlko7elisback62]

@@majdouline04 تماما اختي المشكل فالشعب ماشي راجل نهار تمشي انابيك غادي يزيان سوق الشغل و حتى الصالير

[@majdouline04]

@@wahedmnlko7elisback62 الرجاء فالله وحده الرحمة نستناوها من عند الله وحده🌼 اللهم صلي على سيدنا محمد خير الأنام عليه افضل الصلاة والسلام 💙

[@khadijaghandouri9174]

شكرا ليك بزاف هدي معلومات مهمة جدا الله احفظك

[@imanenaairi1214]

شكرا لك بزاف و الحمد الله شفت هاد الفيديو اليوم

[@abdrahimbourguia3331]

سمحلي TVA الضريبة على القيمة المضافة بمعنى ضريبة الاستهلاك. أعتقد أنك تقصد IR الضريبة على الدخل ، بنسبه الاجير الذي يتقضى الحد الادنى للاجور SMIC ,معفى من الضريبة على الدخل.

[@moulaydrisslamine539]

great

[@7ikayah]

❤️❤️❤️

[@Narjiss797]

الله يجازيك بخير اخي فعلا لازلنا نعيش مظاهر الطبقة البروليتارية

[@nouhznibi2297]

Chokran bzzf 3la HD lm3loumat

[@azeddineazeddine1290]

وفي حالة خويا خدمت ست شهر ووقفت الكونطرا انابيك وبغيت نخدم بيها في شركة أخرى واش كتنقص منها المدة ديال العامين يعني غاتبقا ليك 19 شهر أو لا كاتبقا عامين

[@footballeur703]

غاتبقى 19

[@ilhamsahaoui4116]

للاسف انا تصيدت ف 2010 بهاد الكونطرا مكانتش عندي معلومات عليها المهم الرجا فالله هدا مكان شكرا خويا على هاد الفيديوات ديالك المفيدة 👍

[@user-bt6rp4vt8t]

بحالاش اختي تصيدتي

[@ilhamnardine5725]

Svp wach ila khdmouk l anapec wach Kadi m3a chi haja f le salaire dialk

[@pakade1]

@@ilhamnardine5725 akhti rah lmochghil li mstafd mnki hit raki rir stagér fhmti y3ni tgdi tkmli dik 2nas wla la...wchof tchof wach ydiro m3aki CDI mn b3d.. fhmtini

[@pakade1]

@@ilhamnardine5725 akbar 9alb howa had contrat anapec walakin ila l9iti lbadil li howa CDI wla CDD ahsan

[@hajarfarah5258]

@@dojaod6765 مخاصكيش تكملي 6 شهور فهمتي الا بغيتي متحسبش ليك ديك الكونطرا

[@brahimmihard]

⁦👏🏻⁩⁦👏🏻⁩⁦👏🏻⁩⁦👏🏻⁩ تبارك الله عليك ⁦❤️⁩⁦❤️⁩

[@user-gz3pr3zh7k]

شكرا اخويا ان جديذة معك 🖒✋على هذى معلومة الشباب المسكين الكايضعوهم في حقهم الله ياخد الحق👍⬜ مزيد من التألق ا⬜🖒🖍

[@abdelkarimghani7068]

السلام عليكم فقدان الشغل واش كيعوضك الضمان الاجتماعي علما انني خدمت معاهم مدة 3سنوات ونصف كونترا CDI لي عندو شي معلومات يفيدنا الله يرحم الولدين

[@user-kx1vj8fl2g]

خاص 780 نقطة

[@ingenieurenmecaniqueaerona6310]

المغرب فيه ڤامبير الله يعفو علينا منهم هد الشيء الي كينتج بعد زواج المال والسلطة

[@yassinerb8165]

لاحول ولا قوة الا بالله 🤦🤦🤦🤦🤦 الله المستعان شكرا على المعلومة شرح ممتاز❤

[@Waliidobk]

Bravo frère olh cher7 mzyaaan ou hadchi li khaaasna nfaahom 3titih bravo et chapeau

[@linalinoucha5594]

درتهوم كولهم مشاركة وجيم وتفرجت فالفيديو تستاهل كل الخير مواضيع جد مهمة الله يوفق والحل الوحيد هو انهم يقاطعو لانابيك وحتى واحد ميمشي يقصدها باش تكون هي الوسيط ليهم بالتالي غدي يخظعو للامر الواقع وتخيد شي خاجة سميتها انابيك وراه مزالين شركات كبار فيهم تغطية صحية وووو كيخدمو بلا انابيك غير الواحد يقلب مويان انا كنأكد ليك هاذ المعلومة وعمرو ميفكر يمشي لانابيك والله يسهل على الجميع

[@ahmedbenhalima5504]

اخي كيف دخدم مع شركات بلا عقد انابيك

[@alitabiaoui2241]

اخي هذا المحتوى خاص بالشركات لكن كيف يمكن تفسير كونطرا انابيك بالنسبة لتعليم

[@meryemyaazza]

نفس السؤال بغيت ندفع للتعليم الأولي وا ش حتا هوما كايمشيو على نفس المنوال

[@ENG_ALMAESTRO]

الله يرحم ليك الوالدين و هوما الله يغرق ليهم الشقف

[@Fouziaprince]

رااائع استفدنا معاك بزااف😍

[@ayoubkamikas7660]

والله امكرهت اخويا هد لاشين تطلع

[@7ikayah]

ان شاء الله أخي واخا صعيب هاد القنوات الهادفة تطلع

[@ossamanissoul5577]

ghiiir ketkharbe9 a 3chiri, rewenti les infos kamlin, lhaja li kayna wa hiya dawla dayra tashilat lcharikat li yallah bdat bach matkhalesch cnss o tkhadem drari yallah bdaw saaaaafi, o fach kiched l'exp khasso y9eleb fi jiha akhra

[@fatimaoualla7044]

زعما انابيك عكس هادشي ليقال ؟

[@ossamanissoul5577]

@@fatimaoualla7044 khti makayn la tsyida la walo ketkhedmi 3adi bi salaire li ketfahmo 3lih

[@salmachajri3248]

@@ossamanissoul5577 daba ana khdite diplôme en gestion hôtellerie ou bite namchi nat9aayde wech 3adi wala namchi ndf3e cv les hôtels hta ila mal9itch stage nadf3e liha gouliya chno balik

[@fatimaoualla7044]

@@ossamanissoul5577 واخا يعني واش ضروري لابغيت ندوز مباراة خاصة بتعليم اولي نمشي عندهم ولا ماشي ضروري

[@ossamanissoul5577]

@@salmachajri3248 bjoj a khti, o andek la chance ktar ila mchiti anapec, hit les hotels kimchiw andhom direct, defi l anapec o dori bouhdek dirihom bjouj

[@younesmhamdi6808]

Merci pour votre explication

[@Red_light36]

Chokran bezzf ela lmaelooma akhie

[@Mii417]

سؤال من فضلك كنتمنى تجاوبني عليه اذا خدمت بكونترا cdd و صافي انتهت المدة د الكونترا و جبرت خدمة بكونترا Ci واش عادي كيبقى عندي الحق ف هد كونترا ولا لا ؟

[@shaymae148]

الا كملت ستة اشهر مايبقاش عند الحق ف انابيك

[@BrahimJeghal]

3:11 الضريبة على الدخل IR الضريبة على القيمة المضافة TVA

[@anouarmelouli6655]

بارك الله فيك أخويا

[@user-rt6fh8cw9u]

معلومات مفيدة. الله يحفظك

[@majdoolineboumahdi183]

سلام اخويا عفاك الى معطيني شي حل بغيت نخدم عيت مندق فلبيبان والوا الله اجزيك بخير الى مكوليا اشنوا ندير

[@7ikayah]

اختي انا براسي ماخدامش والله النصيحة لي نعطيك من اخ لاخت هي ديري مشروع خاص عل الأقل ديري روض للأطفال أو دروس الدعم للابتدائي والاعدادي

[@user-xo3jh9ue8c]

بحالك اختي

[@ahlamelfalhi]

عفاك اخويا نسولك انا يلاه غادي نبدا مع واحد صونطر دابيل بكونطرا انابيك و بغيت قبل 6 شهر نخرج بحالي واش ممكن ولا ضروري غادي يگولو ليا حتى تكملي عامين عاد خرجي

[@ahmedbenhalima5504]

انا غدا عندي معاهم

[@abbadasmae265]

شكرا ليك اخي 🙏🏼

[@mohamedrihani1626]

شكرا بزاف على هد معلومة

[@hananeab7321]

شكرا على التوضيح أخي سؤالي هو واش هاد الكونطرا كتبقى تابعاك مدى الحياة بمعنى أخر إلى بغيتي تخدم في بلاصة اخرى بحال الدولة واش ماتوقفش فطريقك وشكرا

[@winklekm9058]

ويييههادي هي المصيبة

[@7ikayah]

لا اختي يمكن ليك تخدم فالدولة عادي لكن صعيب تخدم فالخصوصي الا كنتي كملتي فيها 2 سنوات

[@moutawakelyoussef3368]

@@7ikayah بحالاش الخصوصي

[@ichraqabdenbi3295]

عندي نفس السؤال حيت سمعت بلي ايلا خدمتي كونطرا أنابيك معندكش الحق تخدم فالدولة واش بصح ؟

[@madaranabil3775]

الشركات اخويا نصابين والله وماكينة تا محاسبة معاهوم رآه الشباب بخدمة ها بالف وخمس مئة درهم وما فيها لا ضمان اجتماعي لا والو

[@bts_teekoo]

So creative ❤

[@soukainadxn3038]

Xokran akhoya bzf wlh 3ad daba jit ntsjl osalit ogaloli nsiti xi haja ohwa ytl3 lya video dyalk oana ndkhol lhmd llah li dkholt 9bl mantsyd🌹

[@user-yj2wi6ps9k]

الله يخليك اخي الكريم عندي سؤال انا محتاجه نخدم فلكابلاج عندي والدية مسنين و معنديش ديبلوم خرجت من سيزيام واش يقبلوني

[@youssefzaidane1111]

من الشروط ديالهم باكالوريا او دبلوم

[@user-yj2wi6ps9k]

@@youssefzaidane1111 اي ديبلوم اي كان يعني كيف كان يقبلوك؟

[@youssefzaidane1111]

اه كما كان

[@hananhabiba8710]

صراحة بغيت نتسجل فlanapec على قبل مبارة التعليم الأولي ولكن بحكم كندوز مبارة التعليم ديال الدولة خفت على قبل دك العقد لي غندير معهم ما يخولش ليا ندوزها

[@thetaoufiq6703]

غير توكلي على الله المؤسسة المغربية للنهوض بالتعليم الأولي تستحق منك من الناس

[@fatimaoualla7044]

بمجرد مادوزي مباراة تاع تعليم اولي حيث فيها كونطرا عامين غاتحرمي من تعاقد

[@samiraasswala8437]

سلام ختي اشمن مستوى ل غدوزي في العمومي او كيفاش كدفعي ل التعليم ديال الدولة

[@sarabaji3060]

شرحي ليا اختي كتر

[@hananhabiba8710]

@@samiraasswala8437 الى عندك الإجازة راه غدي تدفعي للتعليم

[@fatijohr5434]

بارك الله فيك 😊

[@HamzaHamza-tb4fc]

جزاك الله خيرا

[@_frkh_8620]

خويا الله ايجازيك بالخير دبا انا يالله صيفطو ليا نمشي ندوز entretien باش ندوز عندهم واحد فورماسيون ولكن ملي شفت هادشي خلعتيني واش نزعم او نتراجع

[@Mostafa40Azher]

حتا أنا صيفطو ليا او ممشيتش😂

[@Mostafa40Azher]

وله

[@user-fp5vj9lg4k]

الله يجيب شي مشية الى الديار الاروبية . اما المغرب معطنا والوا . عايشن فيه مصاصين الدماء.

[@7ikayah]

اللهم آمين نفس الامنية 🌹🌹🌹

[@saadfouad3953]

Ta hia fiha hadchi...

[@ahmedayache3925]

@@7ikayah علاش يا أخي المغرب أحسن بلاد في العالم يقينا إلا الأراضي المقدسة تؤدي المناسك ثم ترجع

[@zakariaslayer715]

@@ahmedayache3925 احسن بلاد ؟؟؟ الاه واش تفرجتي فالفيديو اولا غير جيتي كومونطيتي

[@hamzaabou4821]

@@saadfouad3953 حسن من المغرب من ناحية احترام العمال من حقو يشوف البيئة لي غتحترم كرامته

[@saadi-yt5700]

تحياتي خويا عندك ما تقول ❤️

[@moisespineda7538]

كالعادة دائما الجديد المفيد

[@7ikayah]

بطبيعة الحال الجديد كله مفيد

[@ritajdali6661]

العيب فشباب لي كيقبلو يخدمو بيها لوكان حتا واحد ميقبلها غادي تحيد هاد كونطرا بصح كاين لي يبغي هاد الاستغلال

[@wahidelakhdar7340]

ما كاينش البديل

[@ritajdali6661]

@@wahidelakhdar7340 هاد الكلمة هي لي خلات شركات يستغلو ناس حيت مكانش البديل لوكان تمشي نتا طلب حقك ولي موراك يطلب حقه هوما لي غادي يعطيونا حقنا وهوما لي غادي يقولو مكانش البديل

[@wahidelakhdar7340]

و اشنو الحل

[@wahidelakhdar7340]

انا عندي دبلوم و اجازة مهنية و عاطل عن العمل

[@ritajdali6661]

@@wahidelakhdar7340 الله يسهل أمورك

[@marouaneamegrissi3592]

السلام عليكم وتبارك الله عليك عندي سؤال كنتمنى تجوبني عليه هاد الكونطرا مني كتخرج من الخدمة مكتقدمش آستقالة ديالك حينت محسوب غير سطاجير

[@7ikayah]

لا ايلا بغيتي تخرج ضروري تقدم استقالة باش يوقفوا ليك العقد من الانابيك

[@allgamespro7584]

@@7ikayah سلام خويا الله نورك واش غدي تقدم استقالة من عندهوم ولا خاصك تمشي انابيك باش توقف كونطرة

[@chaimaerhalima945]

عقد تقدر توقفو غير بحدك من انابيك

[@moutawakelyoussef3368]

@@chaimaerhalima945 حيت ايلا موقفتيهش ايبقا ويلا فات 6 اشهر غاتصيد ياك .

[@jimcemadadi4769]

@@chaimaerhalima945 ختي واش من انابيك تقدر توقفوا ولا ضروري المشغل هو لي كيمشي انابيك بعدما درتي واحد إلتزام او كليزتيه في المقاطعة

[@Maya-queen867]

الله يعطيك الصحة

[@user-rd7qy7yi2p]

شكرا للتوضيح