Quranda bədnəzər, gözdəymə varmı?

Uca Allah Quranda başımıza gələn müsibətlərin öz əllərimizlə qazandıqlarımız üzündən olduğunu bildirdiyi halda, biz başqasının gözünün dəydiyinə inanırıq.
Rəbbimiz bizə gələn yaxşılığın Allahdan, başımıza gələn bəlanın isə özümüzdən qaynaqlandığını bildirdiyi halda, biz insanların nəzərlərinin bədliyinə inanırıq.
Yaradan onun biliyi və nəzarətindən kənar heç nəyin baş vermədiyini bildirdiyi halda, hələ də nəzərdən Allahın xəbərinin olmadığına inanırıq. Bu müsəlmanın inamı və imanı deyil. Çünki gözdəymənin olduğuna inanmaq başqasına fövqəladə bir güc verərək onu sanki Allaha ortaq qoşmaqdır.
Nəzərlə əlaqəli Peyğəmbərə istinad edilən rəvayətlərin heç birinin Quran süzgəcindən keçmədiyi üçün doğruluq payı yoxdur. Bütün bunları nəzərə alıb bir daha və gur səslə deyirik ki, İslamda gözdəymə, bədnəzər anlayışı və inamı qəti olaraq yoxdur. Olmayan bir şeydən də qorunmaq üçün əsas yoxdur. Bu məqsədlə edilən əməllərin, yazılan duaların və yandırılan üzərliklərin heç bir anlamı yoxdur. Bu sadəcə aldatmaqdan və aldanmaqdan başqa bir şey deyildir.