Рет қаралды 1,417
Ölə bildinmi
Məni unutmağa çalışan qadın,
Adımı qəlbindən silə bildinmi?
İnanıb sözünə özgənin, yadın,
Dərdini onlarla bölə bildinmi?
Gecələr adımı sayıqlayarkən.
Saçına bəyazlar düşdümü erkən?
Mən burda həsrətdən qan ağlayarkən,
Sən orda sevinib gülə bildinmi?
İndi nə fərqi var, kimdir müqəssir?
Mən sənə inandım, məndədir təqsir.
Bütün səhvlərimi sayardın bir-bir,
Bəs öz günahını bilə bildinmi?
Həqiqi sevgimə xəyal deyərdin.
Yoxdur sevgimizdə amal deyərdin.
Gah mənə get deyib, gah qal deyərdin,
İndi bir qərara gələ bildinmi?
Söyləmə nankorsan, nə verdin mənə?
Dərd verdin, bəs idi öz dərdim mənə.
Mən sənsiz ölərəm deyərdin mənə,
Yumub gözlərini ölə bildinmi?
müəllif: Nüsrət Həsən
02.05 2023