Рет қаралды 1,940
مساء الخير ،، اسمي ندى أحمد ومن ٧ سنين نجحت في ثانوية عامة وقررت أدخل كلية الألسن لكن لسبب ما كانت ألسن أقاليم.
اشتغلت على نفسي قدر المستطاع ورتبت على دفعتي وحولت تقديراتي من مقبول في بعض المواد لامتياز. اتخرجت واتفاجئت بمتطلبات سوق العمل ومش محتاجة أوضحلكم الفجوة 😃
اترفضت مرتين في في الشركة اللي كان نفسي اشتغل فيها قبل م اتقبل في المرة التالتة، خدت الخبرة اللي محتجاها واتجرأت وعملت ريزاين وقررت أدخل مجال الترجمة وكمان آخد شهادة ال CILS C1.
عديت بعقبات كتير وللأسف اتعرضت لنقد غير بنّاء كتير وكان ممكن أصدق إني فاشلة وأوقف طموحي وأفضل في ال SafeZone، لكن بفضل الله صممت أكتر إني أوصل لأهدافي ولأهداف أعلى منها كمان.
النهاردة أنا بحتفل معاكم بنجاحي في امتحان ال cils c1 في المحاولة التالتة بعد محاولتين فاشلين.
هكتب البوست دا وأنام بدري عشان الحق شغلي في مكتب الترجمة المعتمد من السفارة اللي المترجم اللي شغال فيها هاجم طموحي، ولما أرجع هشتغل على الكتاب اللي بترجمه مع نفس دار النشر اللي دكتوري اللي قاللي إن أنا ودفعتي كلها فاشلين شغال فيها.
رسالتي لكل طالب لغات: كل ما توصل لمفترق طرق اختار دايمًا إنك تكمل الطريق للآخر، رغم الصعوبات ورغم الانتقادات، صدقني لما توصل هتصغر في عينك كل العقبات وهيقل في نظرك أوي كل حد قرر يهامجك. بس افتكر: لما توصل متكونش نسخة من اللي صعبوها عليك 😉
أخيرًا: دعواتكم ليا بالتوفيق ولكم مثله يارب 🙏🏻