Рет қаралды 319,002
#محمد_السكران
..
ياجدي آدم عليك افضل صلاة وسلام
الوضع ماهوب ياجدي على ماتحب
مادام بيني وبينك فوق مليون عام
وجب علي اعترف لك بالحقيقه وجب
ياوالدي وضعنا ماهو على مايرام
بعلّمك بالعلوم وخل صدرك رحب
من يوم مانمت في قبرك وطال المنام
الواقع مخيف والدنيا تثير العجب
انفض غبارك انا غاضب وعندي كلام
لابارك الله فالشاعر اذا ماغضب
من عقبك احفادك انقسموا واخس انقسام
عابتهم ارجوك يمكنه يفيد العتب
النار من بينهم وصلت حدود الغمام
وقودها الناس مافيها رماد وحطب
مذاهب وكل مذهب فيه مفتي وامام
زحمة ديانات تجلد بعضها فـ الخُطب
والدين مبدأ ونفس(ن) سامية واحترام
ماهو بـ ذرة كراهية ودورة نشب
والدين منهج وكيفية حياة ونظام
ماهو نزاعات ياصل دمها للركب
في ثورة النور مازلنا نعيش بظلام
سلومنا عقدتنا ياسلوم العرب
احلامنا علّقوها في حلال وحرام
تخيل الحب ياجدي مهو مستحب
في مجتمع يحتقر من يعترف بالغرام
مايعترف بالغرام الا قليل الادب
تصدق انّا وصلنا لاخر الانفصام
صرنا نقيس الرجوله بالدقن والشنب
ومن عليّ الطلاق الى علي الحرام
بناتنا ارخص من المعدن بسوق الذهب
تركض بنا خيل جهل(ن) ماعليها لجام
وسحابة الهم يومياً تصب وتهب
وقبايل تحسب ان الجهل ذروة سنام
يفخر بعضها على الثاني بكثر النهب
مادام حنّا عيالك وانت جد الانام
اجل على ايش التفاوت فالحسب والنسب
حنا غدينا مثل جسم(ن) بليا عظام
والجسم مايرتفع لاصار جلد وعصب
يبه حفيدك كبر من قبل سن الفطام
شابت نواصيه من هول الزمان وتعب
دوّرتك بكل شبر(ن) فيه ريحة سلام
عشان اعلمك عنهم مير ماالله كتب
من حقي اقول رأيي لو لحقني ملام
قبلي نبي الله بقول الصواب انصلب
من يزرع السلم في ناس(ن) تحب الخصام
مثل من يدور بعيدان الارطى رطب
ودعتك الله يبه ماني مكثر كلام
لاكن قبل لااتركك ترتاح عندي طلب
سلّم على جدتي حواء كثير السلام
قل يمه عيالك اختلفوا على اتفه سبب