شيلة حفل زواج : عامر آل دعيرم | كلمات : محمد بن دعيرم | أداء : حمد الطويل

شيلة حفل زواج ؛
عامر بن علي آل دعيرم
كلمات الشاعر : محمد بن دعيرم
أداء المنشـــد : حمد الطويل
" الكـلـمـات "
حمام الدار محسوبك من العالم غريب الدار
لعج في خاطري حزنٍ بصدري قوّم الثوره
انا قدلي ثلاث شهور بين اللوح والمسمار
وثلاث شهور عن سالم وعن جوزا وعن نوره
كذا المجموع سته واستلم ياراعي الاخبار
من اللي لو كبر حزنه بصدره ماكتم زوره
ولو صكت عليه ظروف وقته مايفك زرار
تحسبه من كثر صكات بقعا فاقد شعوره
وهو والله موكلها الولي الواحد القهار
تحت تدبيره الايام منهيه وماموره
هذا الموجز ولدوا الروس والاسماع والابصار
بدا التفصيل للاخبار والاخبار منشوره
انا توي دريت اني مع العالم غريب اطوار
بعد شفت السحاب عمامتي والارض لي كوره
عن الصندوق خارج واخرج الصوره من الايطار
و ادخل من براسي داخل الصندوق والصوره
على فكره انا والله ماعندي بنات افكار
انا عندي رجال افكار مسميه ومطيوره
بعد ما اخذت فـ أم الشحم فنجالي من ام ابهار
يا عامر جتك عصماً من جزيل الشعر مذعوره
هلا يا مرحبا ترحيبةٍ يقطع ورا الصرار
صداها لين مايلفت صداها راس تنوره
هذا حفل ال دعيرم مكرمين الطرقي المرار
تحت سقفه يعيش العز بين ارضه وجمهوره
هنا للضيف عود ازرق هنا للضيف شط حوار
هنا حتى مساعي طيبين الذكر مشكوره
هنا حتى الذبايح تنطبخ وسط السلام الحار
مع ان القدر جوف الصدر ولا الكبش فقدوره
دخاخين المباخر تحجب الرؤيه عن الانظار
ياعامر نوه العالم ترا مامنه اخطوره
يا عامر روح سيده لاتلف يمين ولا يسار
وقبّل خشم مَن سود الليلي معه مقهوره
هذا الدكتور لا وقف يصيرون الكبار صغار
هذا عمي ومن له مثل عمي زانت اموره
علي واللي عليه من الثنا مايملي الاقطار
مديح عند اخو مريم واخو شما واخو نوره
وهو واحد من العجمان والعجمان مهما صار
ماتترك حقها والوقت له لفه وله دوره
محزمة القنازع يومها بالصارم البتار
بنينا مجدنا وافعالنا في نجد مشهوره
ترانا لاهبدنا الارض منها مايطير غبار
تطير الروس واللي ماوصل دوره وصل دوره
ولدنا لا احتمى دون البيارق جعفر الطيار
يفادي بيرق العجمان لو يديه مبتوره
وانا من ترثة سليمان والي مايجار يجار
علينا يزبن المجرم وفينا يهتدي شوره
نفاخر بـ اسمنا اللي ماهو بمصنوع من فخار
على التاريخ وسمه ماكتب في لوح صبوره
سقى الله وادي العجمان وبلٍ صيّبٍ مدرار
وعسى دارٍ بها مطلاع بن حثلين ممطوره

[@omarbinkhaledalajmi8994]

لله دررررررك يبو سالم اقسم بالله مدري وش اقول اكثر من كذا والله يصح لسانك ومبروك ما سعيتوا فيه يـ ربعنا 🔥

[@bn20i]

عسى الله يوفقك يابو علي ، ويتمملك على خير 💐

[@user-qd2xt6uu2e]

صح لسانك يا ابو سالم

[@شهدالشهد-ه9ه]

الله صح لسانك ❤❤❤

[@العجميالعجمي-س8ش]

🔥🔥🔥

[@iiaaa18]

🔥🔥🔥🔥🔥

[@سالمالعجمي-ع8غ]

ال سليمان

[@dealajmi3410]

ال دعيرم من اي عجمان

[@Al12ill]

ال سليمان

[@rakanmubarak-l3c]

ال سليمان ال جابر الجبعر الغرير ال دعيرم