Рет қаралды 351
Былатын Ойуунускай аатынан Саха академическай театра балаҕан ыйын 27-тэн алтынньы 6 күнүгэр диэри Санкт-Петербург, Элиста, Москва уонна Хабаровскай курдук бөдөҥ куораттарынан гастуруолга сылдьар. Улахан айан «Большие гастроли» федеральнай бырагыраама чэрчитинэн тэриллэр уонна Саха Өрөспүүбүлүкэтин 100 сыллаах үбүлүөйүгэр ананар.
Ол курдук Саха театра историятыгар маҥнайгытын Санкт-Петербург аатырбыт Александринскай театрыгар уонна Москваҕа Арассыыйа аччыгый театрын сыаналарыгар оонньуур. Хотугу киин куорат көрөөччүлэрэ Л.Пиранделла «Театрга буолбут түбэлтэ», У.Шекспир «Илиир хоруол» испэктээкиллэри көрүөхтэрэ. Онтон Калмыкия киин куоратыгар - Элистаҕа, көрөөччүлэр көрдөһүүлэринэн Ч.Айтматов «Хаарыан хампа күөх кытылым...» уонна Л.Пиранделло «Театрга буолбут түбэлтэ испэктээкиллэрэ туруохтара.
Салгыы Москваҕа аатырбыт Малай театрга Т.Семушкин «Алитет хайаҕа күрүүр» уонна У.Шекспир «Илиир хоруол» испэктээкиллэрэ көстүөхтэрэ. Саха театрын «улахан гастроллара» Хабаровскайга Уһук Илин театрдарын бэстибээлигэр М.Горькай «Тимир Баасса» испэктээкилинэн кыттыытынан түмүктэниэхтэрэ.