Рет қаралды 669,623
“Azərbaycanın birinci xanımı da bunu özü hiss eləsəydi, müharibə çoxdan qurtarardı”.
AzadlıqRadiosu Ermənistan xidmətinin məlumatına görə, bunu bunu Ermənistanın birinci xanımı Rita Sarkisian deyib.
Rita Sarkisian Yerevanda veteranlar şurasının üzvləri ilə görüşüb.
Görüşdə ona Dağlıq Qarabağdakı hərbçilərin sosial vəziyyəti, yaşayış şəraiti ilə bağlı sual verilərkən o, belə cavab verib.
“Mənim özüm müharibə vaxtı Qarabağda idim. Mən müharibənin nə olduğunu öz həyatımda hiss eləmişəm. Bombalardan biri qonşumuzun evinə düşdü , mənə çox pis təsir elədi, bu dəhşətli idi.
Mənə elə gəlir ki, əgər Azərbaycanın birinci xanımı da bunu özü hiss eləsəydi, müharibə çoxdan qurtarardı”,deyə o bildirib.
Qeyd edək ki, Ermənistan prezidenti Serj Sarkisianın arvadı Rita Sarkisian Xankəndidə anadan olub.
Xatırlatma
Qarabağ münaqişəsi yenidən 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi, ona bitişik 7 rayon və bəzi əlavə kəndlər işğal edilib.
Qarabağ münaqişəsi ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr ölkələrdir.
Münaqişənin üstündən bu qədər vaxt keçməsinə baxmayaraq, BMT-nin Azərbaycanın işğal edilmiş ərazilərinin geri qaytarılması və qaçqınların geri qaytarılması ilə bağlı qəbul etdiyi qətnamələrin heç biri hələ də yerinə yetirilməyib.
Mayın 8-i Dağlıq Qarabağın əsas şəhərlərindən olan Şuşanın işğalının 25 ili tamam olur.