Серік Сәпиев: Давид Лемье Генаға лайықты қарсылас емес

Қазан айының 17-де әлемдік бокс мамандарының назары Головкин мен Лемье жекпе-жегіне ауады. Орта салмақтағы әлем чемпиондарының кездесуі Нью-Йорк қаласындағы Мэдисон Сквер Гарденде өтетін болады.
Тұңғыш рет ақылы экранда шаршы алаңға шығатын қазақстандық былғары қолғап шебері WBA (Super), IBO және WBC тұжырымы бойынша өз атағын қорғайды. Канадалық боксшыға IBF алтын белдігі тиесілі.
Давид Лемьенің жаттықтырушысы Марк Рэмзи өз шәкіртіне сенімді секілді. «17 қазанда біз көпшілікті таң қалдырамыз. Бокс жанкүйерлері жаңа чемпионды көретін болады. Давид бұл жекпе-жекке 100 пайыз дайындықпен келеді», - дейді Рэмзи. Алайда оның көзқарасымен келіспейтіндер де жетерлік. Мысалы, бокстан Олимпиада чемпионы Серік Сәпиевтің өз ойы бар.
Серік Сәпиев, бокстан Олимпиада чемпионы
-Мен Лемьенің жекпе-жектерін көрдім. Головкинді де жақсы білемін. Сондықтан Геннадийдің жеңісіне ешқандай да күмән келтірмеймін. Әрине, бұл басқа кездесулерге қарағанда жауапкершілігі жоғары. Себебі ақылы экранда өтеді. Бірақ Давид Лемье Генаға лайықты қарсылас деп есептемеймін. Сондықтан біз тек қай раундта нокауд болатынын күтеміз.