Рет қаралды 210
Përgatitja e Bukës për Meshën Hyjnore
Nëse zemra jote dëshiron të merret me gjëra të shenjta dhe Hyjnore, jepja këtë mundësi duke sjellë në Meshën Hyjnore, bukën e Meshës të bërë me duart e tua.
Që dhurata jonë të bëhet e pranueshme nga Perëndia, duhet pastërtia e trupit dhe e shpirtit. Të veshur, pra, me rroba të pastra fillojmë gjithmonë këtë punë me fjalë lutjeje dhe vazhdojmë brenda një atmosfere lutjeje.
Lutja përpara përgatitjes së bukës së meshës
Në emër të Atit, Birit dhe Shpirtit të Shenjtë, tani e përherë e në jetë të jetëve. AMIN.
Shenjt Perëndi, Shenjt i fuqishëm, Shenjt i pavdekshëm, mëshirona (3x).
Trini e Tërëshenjtë, mëshirona; o Zot, falna mëkatet tona; O Zot i madh, ndjei paudhësitë tona; o i shenjtë, vështro dhe shëro sëmundjet tona, për emrin tënd.
Mëshiro o Zot (3x).
Lavdi Atit, Birit dhe Shpirtit të Shenjtë, tani e përherë e në jetë të jetëve. Amin.
Ati ynë që je në qiejt, shenjtëroftë emri yt, ardhtë mbretëria jote, u bëftë dëshira jote si në Qiell ashtu dhe mbi dhe. Bukën tonë të përditshme jepna neve sot; dhe falna fajet tona, sikurse dhe ne ua falim fajtorëve tanë dhe mos na shtjer në ngasje por shpëtona nga i ligu.
O Zot, të falenderoj për këtë orë të shenjtë, që me duart e mia mëkatare më vlerëson të bëj Dhuratat e Tërëshenjta të dashurisë Sate.
Të lutem na dërgo nga qielli Shpirtin Tënd të Tërëshenjtë, që bekon të gjitha Misteret e Kishës, bekoji dhe këto Dhurata që të bëhen të mira dhe të pranueshme në Shenjtëroren Tënde të Shenjtë.
Dhe të lutem, ti pranosh ashtu si pranove flijimin e Abelit, lavdërimin e barinjve, dhuratat e magëve, lotët e Petros dhe pendimin e kusarit.
Dhe më vlerëso që Ti dhuroj përgjithmonë me ndërgjegje të pastër. AMIN.
Përbërësit
Përbërësit janë:
750 g miell,
1 lugë çaji kripë,
1 luge të vogël kafeje me maja
3 filxhan çaji ujë të vakët.
Para se të fillojmë, ngrohim tavën dhe e lyejmë me dyll, nëse nuk keni dyll, lyejeni tavën vetëm me miell.
Bërja e brumit.
Në një enë të madhe hedhim miellin e situr dhe kripën. Marrim një gotë me pak ujë të vakët, tretim aty majanë e hedhim në miell dhe fillojmë të punojmë brumin pa ndalur 15 - 20 minuta, duke patur kujdes që brumi të mos bëhet shumë i butë.
Mbështjellja
Puna e dytë është mbështjellja në një sipërfaqe të lëmuar. Marim brumin me të dyja duart dhe e rrotullojmë derisa brumi të bëhet i lëmuar nga jashtë. Brenda 10 - 15 minutash do të jetë gati. Atëherë i japim formë të rrumbullakët dhe e vendosim tek tava e bërë me dyll. Mbështjella e mirë e brumit siguron dhe suksesin e vulës.
Vulosja me meshanik
Para se të vendosim meshanikun (vulën) bëjmë shenjën e kryqit, vendosim brumin në tavë, meshanikun e lyejmë me miell, e shkundim, pastaj vendosim në qendër të brumit dhe e shtypim me forcë pa e lëvizur, në thellësi deri një gisht, në mënyrë që të dalë mirë vula. Duke e lëvizur pak, fillojmë të ngrejmë meshanikun, në mënyrë që të marrë ajër dhe të dalë lehtë.
Ardhja e brumit.
Mbulojmë bukën e meshës me pecetë të pastër, e vendosim që të vijë. E lëmë kështu gati 2 orë. Gjatë kësaj kohe shohim herë pas here nëse ka ardhur.
Pjekja
Një çerek ore para se të futim bukën e meshës brenda në furrë me një gjilpërë metalike të gjatë, bëjmë vrima sipër bukës së meshës derisa gjilpëra të prek në fund të tavës, në këto pika të vulës: në katër cepat e pjesës qendrore (qengjit) dhe në periferi. Lëvizim pëllëmbën e dorës sipër në mënyrë ciklike, që të dalë ajri dhe e vendosim në furrë në temperaturën në 140⁰C (kjo varet nga furra) për gati 1 orë e 30 minuta. Pastaj e fikim furrën dhe e lëmë brenda në furrë për 10 minuta të tjera që të iki lagështira. E marrim dhe e vendosim brenda pecetave të pastra.
Asnjëherë nuk është e gatshme për proskomidhi një bukë meshe e freskët dhe e patharë mirë. Duhet mjaft kohë që të thahet. Të paktën të jetë përgatitur një ditë më përpara. Kur me duart tona marrim një bukë meshe, mbajmë diçka të shenjtë. Këtë do ta përdor prifti dhe do të kthehet gjatë meshës Hyjnore dhe do të bëhet trupi i Krishtit.
Në një letër shkruajmë "Të gjallët" dhe poshtë kësaj do të shkruajmë emrat e familjes sonë, të afërmëve dhe të miqve emrat e atyre orthodhoksëve që gjenden në momente të vështira, emrat e atyre që na kanë kërkuar të lutemi për ta.
Në një letër të dytë "Të fjeturit" do të shkruajmë emrat e të fjeturve dhe ja dorëzojmë priftit, herët në mëngjes të dielën, që të përdorë Meshën dhe të kujtojë në Proskomidhi emrat që do çojmë.