Рет қаралды 78,406
Жамбыл облысында әскери борышын өтеп жүріп жұмбақ жағдайда жоғалған Ұлықбек Бердішевтің мәйіті Қырғызстаннан табылды. 40 күннен бері хабарсыз кеткен сарбаздың әскери киімінің қалдықтарын шопандар көріп, жедел шекарашыларға жеткізіпті. Ал әскерилер айтылған жерге барып, қатардағы жауынгердің тасқа асылып тұрған денесін тапқан. Қайғыдан қара жамылған Бердішевтер әулеті, Ұлықбектің өзіне қол салуы мүмкін емес деп отыр. Сөздерінше, ұлдарын әлдекімдер байқамай өлтіріп алып, қылмысты суицид жасады деп жаба салмақшы.
Осыдан үш күн бұрын тауда мал бағып жүрген қырғыз қойшысы әскери киімнің жыртықтарын тауып алған. Сөйтіп, сақшыларға хабарлапты. Көрші елдің шекарашылары бірден «Андас батыр» шекара бекетіне хабар берген. Әскерилер дереу жоғалған жауынгердің туыстарын тартып, киім қалдықтары табылған аумаққа барған. Ал аз уақыттан соң белдігіне асылып тұрған Ұлықбектің денесін тапқан.
БАУЫРЖАН МЕРЕКОВ, Ұлықбек Бердішевтің ағасы:
- Басынан тасқа байлап қойыпты. Бала былай салбырап тұр, қиғашынан былай жатыр. Ісініп кеткен расында да, иісі шыққан баланың. Ол енді бір айдан бері сол жерде ілініп тұрған балаға мүлде ұқсамайды. Баланы өлтіріп алғанға ұқсайды....Малмен өтеді, наркобизнеспен өтеді дейді. Сондай болғаннан кейін бала сондай бір құпияны көріп қалды ма немесе біреу байқамай ұрып, өлтіріп қойды ма?
Отан алдындағы борышын өтеуге барып белгісіз жағдайда бақилық болған Ұлықбектің қазасына қатысты Ұлттық қауіпсіздік комитетінің өкілдері сұхбат берген жоқ. Тек ведомствоның ресми сайтында сарбаздың мәйіті табылғаны және тергеу басталғаны туралы ақпарат жарияланды.
ҚР ҰҚК БАСПАСӨЗ ҚЫЗМЕТІ:
- Бұл дерек бойынша Қырғыз Республикасы, Шу облысы, Панфилов ауданының ІІБ тергеу іс-шараларын бастады. Алдын ала диагнозы: механикалық асфиксия, зорлық-зомбылық әрекет белгілері жоқ. 2022 жылғы 11 сәуірде Шекара қызметі мәйітті ата-аналарының тұрғылықты жері бойынша Қызылорда облысына жеткізуді ұйымдастырды.
Ал қара жамылған әулет «қысым көрген баламыздың өліміне кінәлілер тиісті жазасын алсын» деп талап қойып отыр. Әрі, марқұмның қандай жағдайда көз жұмғанын анықтау үшін тәуелсіз сараптама жасатпақ.
Нұрболат Жаңабекұлы, Дәулетбай Нұрмахан
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#ҚазақстанӘскері #әлімжеттік #ҚарулыКүштер