سمكة البولي باتروس- جربت تربي تنين في الحوض؟؟

سمكة البولي باتروس
تنين الماء
سمكة البولي باتوس سمكة من اغرب اسماك المياه العذبة الي ممكن تربيها في حوضك لأن شكلها غريب حرفيا تنين في الحوض و دي اول حاجة هتلفت نظرك لما تشوف السمكة دي تعالو نتعرف عليها أكتر في الحلقة دي أنا اسامة و دا سمك في مية
سمكة البولي باتروس سمكة مميزة بين اسماك المياة العذبة بشكلها الي شبه الثعابين لكن بوجود زعانف كتير علي ظهرها و دا الي بيخليها تتصنف من عائلة متعددة الزعانف
سمكة البولي باتروس بتصف من الاسماك متوسطة العدائية يعني مش شرسة زي الاوسكار مثلا او التليبيا او الباكو بيرانا و الاسماك دي
لكن في نفس الوقت مينفعش تعيش مع الاسماك المسالمة حتي لو كانت صغيرة هتلاقيها بتتسلي علي الاسماك الضعيفة واحدة ورا التانية دا غير انها بتعتبر سمكة قاع بشكل عام و بتحب الاختباء في الكهوف او بين الصخور و هيا سمكة ليلية يعني بتنشط في الظلام و نظرها ضعيف و بتعتمد علي باقي حواسها في صيد الفرائس بتاعتها
سمكة البولي باتروس بتوصل لأحجام مابين ال 25 سم ل 75 سم في الاحواض لكن في الطبيعة بتوصل لأحجام تتعدي المتر و هيا سمكة متعتبرش سريعة النمو .
سمكة البولي باتروس بتتحرك كمان بشكل غريب جدا بتستعمل زعانف الصدر في السباحة في الحوض و لو ركزت معاها هتلاقيها بتستعمل الزعانف دي في المشي في قاع الحوض زي ما يكون ليها رجلين . مش بقلكم كائن من عصور الديناصورات !!
اللطيف بقي ان موطن البولي باتروس الاصلي هو نهر النيل ايوه دا الي لقيته في كذا مصدر من الانترنت و من المعلومات الي لأول مرة اعرفها برضو ان البولي باتروس سمكة رئوية بتقدر تسبح لسطح الماء و التنفس من السطح و دا سبب وجود فتحتين في مقدمة الرأس و الي بتتمع كمان بحاسة شم قوية جدا بتساعدها علي اصطياد فرائسها ليلا و دا الي بيساعدها انها تعيش في مستنقعات او اماكن تيار المياه فيها مش قوي
طيب الديناصور او التنين الصغير دا لو حبيت اربيه في الحوض بتاعي هحتاج ايه ؟؟
اولا حجم الحوض محتاجين حوض مش صغير 350 لتر تقريبا يعني بنتكلم في حوض مش اصغر من متر و يكون الجرش بتاعة عبارة عن حصي رفيع او رمل سلكا و طبعا كهوف و صخور و مخابي كتير علشان يعيش فيها و طبعا غطا كويس علشان السمكة دا تقدر تنط من الحوض بمنتها السهولة و بتحتاج فلترة متوسطة علشان ترشح الميه من الفضالات و الاضائة عادية و ممكن كمان تبقي منخفضة كده كده البولي باتروس مبيحبش النور اصلا مش هتشوفه غير لما تطفي النور
البولي باتروس بيعيش في درجة حرارة بين 25 ل 29 يعني هتحتاج لسخان في الشتاء
طيب بالنسبة للتوافق بين البولي باتروس و باقي الاسماك يعيش مع ايه ؟
البولي باتروس زي ما قلت انها سمكة شبه عدائية يعني تعيش مع الاسماك الشرسة بشكل كويس طالما بنحافظ علي تناسب الاحجام بين الاسماك علشان متتاكلش او تاكل سمكة اصغر منها ممكن تعيش مع ( الاوسكار- الباروت - النايف - البلاك جوست - الجرين تيرور ) اغلب عائلة الامريكي تقريبا و كمان تعيش مع الافريقي المسالم مع مراعاة الاحجام برضو
و ممكن تربي أكتر من سمكة بولي باتروس في نفس الحوض و بيشكلوا مجموعة في الحوض و بيعيشوا جنب بعض وخصوصا ان البولي باتروس ليه أكتر من شكل في المشجر و الأبيض و المنقط
سمكة البولي باتروس من الاسماك الي مش بتحتاج عناية كبيرة و بتتحمل كويس جدا
بالنسبة لتغذية البولي باتورس بتاكل أيه ؟؟
البولي باتروس سمكة بتتغذي علي البروتين الحيواني بتاكل الاسماك الاصغر منها و اي نوع اكل غاطس في القاع و يفضل الاكل الفريش زي الجمبري او الخلطة او الدود و يفضل تأكلها بالليل او و انت طافي النور و خد بالك كمان انها كلت علشان ممكن الاسماك الباقية تاكل بسرعة و هيا متاكلش
بالنسبة لتفريخ البولي باتروس فالموضوع دا صعب جدا اصلا التفريق بين الذكر و الانثي صعب جدا و مشفتش حد باض حتي عنده و معرفش إذا كانت بتتفرخ في المزارع برا ولا بيتم أصطيادها من الانهار و بيعها
الخلاصة سمكة البولي باتروس مش سمكة مبتدئين لكن هيا سمكة جميلة جدا و لو حافظت عليها فممكن تعيش معاك فوق ال 20 سنة
و هيا فعلا و بلا مبالغة سمكة من زمن الحفريات و الاساطير مجرد سباحتها و ظهرورها في الحوض بيحسسك انك بتمتلك سمكة مميزة جدا
في حوالي 10 انواع من البولي باتروس ممكن تبقي متشابهة شوية بس كلهم مميزين اتمنا تكون الحلقة عجبتكم و متنسوش الدعم باللايك و الشر و السب سكرايب و انا أسامة و دا سمك في مية .
متنسوش تتابعوانا علي صفحة الفيس بوك
/ samakxmaya
وتعملوا فلو لينا في الانيستجرام
/ samakxmaya
و شير لكل أصدقائكم لتصل المعلومة للجميع

[@Ammar-cw6hq]

البولي باترس او البايتشر هي اول سمكه اربيها بالحوض نوعها البينو وحاط معاها كات فيش ، جميله جدا ولكن المشكله الوحيده انها جدا خجوله لازم انا بنفسي احط الوجبه قدامها عشان تاكل

[@alwawtekkamado7561]

ممكن نوع الأكل وطريقة اطعامها

[@noohaa7393]

كنت بدور ع الحلقه دى من بدرى

[@aliismail2947]

عاشت ايدك ، حلو خوش شرح ، تحياتي الك من بغداد ، 🎉

[@husseinjassim-k4w]

من العراق عاشت ايدك شرحك راقي اشكرك ع الحلقه الجميله

[@redagoud5076]

ينفع اربي بولي باتروس في حوض ٨٠ سنتي

[@hamadabokaei1235]

السلام عليكم هل تعيش سمكة الاروانا والبولي باتروس مع السيكلد الافريقي ؟؟

[@samakxmaya]

البولي باتروس ممكن الاروانا لا مش هينفع

[@mohameddesoky2979]

إزاي يصطادون البولي باتريس و فيها البينو

[@samakxmaya]

الالبينو في أنواع منه بتفرخ في الاسر و في أنواع بتصطاد من البرية

[@mohameddesoky2979]

@@samakxmaya لا انت كده تعمل حلقه عن الالبينو الفي البريه

[@samakxmaya]

هحاول انزل عنه بوست في الصفحة حاضر

[@ahmedfouad3131]

فديو جميل يا اسامه بس لي تعليق بسيط بفضل الله ربنا من علينا وتم تفريخ البولي باتروس داخل مزارع جولد فيش والتعليق ده سبق حصري لقناتك لم يتم العلان عنه من قبل تمنياتي بالتوفيق ليك ومزيد من التقدم

[@samakxmaya]

لا أنا اجي اصور بقي السبق العظيم دا 😍

[@minnieshady6492]

اختيار موفق وموضوع شيق وشرح مبسط وجميل خالى من الملل رغم عدم وجود مادة فيلمية وده أكبر دليل على موهبتك تحية كبيرة لك يا أسامة و لفريق العمل كله.

[@samakxmaya]

بشكرك بجد على كلماتك الجميلة

[@احمدمحمود-ف9ظ7ل]

ينفع مع الاوسكار

[@samakxmaya]

ينفع

[@abderrahmanecheraitia2019]

هل يمكن للسكليد العيش مع أسماك أخرى

[@samakxmaya]

ممكن لكن يفضل إن كل فصيلة من الاسماك تعيش مع مثيلاتها

[@abderrahmanecheraitia2019]

@@samakxmaya بارك الله فيك أخي

[@nosaadel7149]

برافو حلقة مميزة وجميلة😍😍

[@ahmed-slem-aquarim]

مشكور اسامه باشا علي الموضوع الشيق 🌷

[@ahmedkarrar1227]

الله ينور شكرا على الإفادة

[@nor90411]

ماشاءالله شكرا جدا ليك لو سمحت ممكن معدل نموها

[@samakxmaya]

علي حسب مساحة الحوض و التغذية بس ممكن توصل ل 30 سم في خلال سنة مثلا

[@sayedfarouk3954]

مجهود رائع

[@soudalqattan4012]

سلام عليكم يصير تربي اوسكار مع الفلور هورن

[@samakxmaya]

لا مينفعش الفلور هورن بيعيش لوحده

[@MahmoudAhmed-nh5hg]

هى ممكن تنط؟ عندى حوض ارتفاع 45سم بس معنديش غطاء شغال ولا ايه؟

[@samakxmaya]

وارد جدا انها تنط من الحوض

[@طيورالزينهوأسماكالزينه]

هو ايه السمك الشرس الي ينفع يعيش في حوض ٦٠في ٤٠ في ٣٠

[@samakxmaya]

للأسف الحجم دا صغير بالنسبة الاسماك الشرسة

[@موقفوحكمه]

موضوع جميل جدا بس نفسي تتكلم على الاسناك هيد بالتفصيل بقالي كتير بطلب منك الطلب ده

[@تايكر-ص4خ]

اني هم اريد يتكلم عن اسنيك هيد نوعيه المورو

[@samakxmaya]

اوك هعمل حلقة إن شاء الله عن السناك هيد

[@خيرالله-ج3ق]

ليه ما في حد حاكي عن السيفيريوم مع انها من اجمل الاسماك

[@samakxmaya]

تصدق فعلا سمكة جميلة و هعمل حلقة مخصوص عنها

[@ehababdelaziz8369]

موبايلي ده اللي بيرن 😂، أنا دحكت كتير وحبيت البولي باتروس وربنا 😂

[@samakxmaya]

😂 أي خدمة طلعتك في الفيديو اهو

[@ehababdelaziz8369]

@@samakxmaya ❤️

[@ahmedelshabrawy9106]

معلش سؤال مينفعش تعيش مع انجل مثلا

[@samakxmaya]

لا هيقرقض في زعانفها و ياكلها

[@ahmedelshabrawy9106]

@@samakxmaya تمام وشكرا جدا لحضرتك❤️❤️

[@Ahmed_Hussain19]

هو حد بيبعها في اسكندريه و بكام؟

[@mohamedsaad5700]

استأذنك فسؤال، عندي سخان Rs 300 wat, والحوض عندي 90 لتر، هل في مشكله ممكن اواجهها؟ وتنصحني بايه؟

[@samakxmaya]

لا مناسب جدا للحوض

[@mohamedsaad5700]

@@samakxmaya شكرا لذوقك

[@mohamedsaad5700]

@@samakxmaya بالنسبه لسحب الكهرباء كفاتوره مش هايبقي 300 ده كتير؟ والافضل اجيب ال 100 وات؟ والسحب واحد فالكل؟

[@samakxmaya]

لا السحب هيبقي واحد لأن ال ١٠٠ هيفضل شغال مش هيفصل إما ال ٣٠٠ هيشتغل و يفصل و دا هيكون اوفر

[@mohamedsaad5700]

@@samakxmaya تمام، اشكرك لذوقك 😊

[@sayedfarouk3954]

مجهود