سمٌ وغربة ¦¦ ملا عباس الكعبي

◾️قصيدة: سمٌ وغربة
◾️الوزن: مجرشه
#الامام_العسكري_عليه_السلام
............
للعسكري هذا الحزن ارض او سمه
و انشيّعه وانودّعه يا فاطمه
نجري الدمع يم بابه .. ونعلگ شمع لمصابه
ـــــــــــــــــــــــــــــــــــــــــــــــــــــــ
يا شيعه نعش العسكري .. هالليله خل انشيْعه
ابضجه ونياحه واللطم .. وعالنعش نجري الدمعه
ابسامره مزدحمه الخلگ .. اتواسي الزچيه البضعه
هالليله ملچوم الضلع .. وبالعسكري منفجعه
◾️ام الحسن يم النعش تجري الدمع
◾️متلوّعه وتلطم على كسر الضلع
سم الاعادي صابه .. ونعلگ شمع لمصابه
ـــــــــــــــــــــــــــــــــــــــــــــــــــــــ
خل يوصل اونين المحب .. لرض المدينه الليله
ودمع الوفه فوگ النعش .. يوم الوَداع انسيله
مسموم و ابديرة غُرُب ..وبالسم تهدّم حيله
انشيل الورد نعلگ شمع .. والمرقده نمشيله
◾️ايرف العلم يحله الذكر طول الدرب
◾️حبكم فرض آل النبي ايصيح الگلب
مفجوعه كل احبابه .. ونعلگ شمع لمصابه
ـــــــــــــــــــــــــــــــــــــــــــــــــــــــ
نندب شبابك سيدي .. واشكثر ظلموك اعداك
انواسي البتول الطاهره .. ابسامره نگصد ننعاك
بين السجن بين الغُرُب .. بالصبر مرَّت دنياك
ويومك يمر بينه جرح .. وتحيي المدامع ذكراك
◾️يالمرقدك يشفي العِلل يروي الظمه
◾️حبك سند يوم الشدد والموزمه
انياله اليشم اترابه .. ونعلگ شمع لمصابه
ـــــــــــــــــــــــــــــــــــــــــــــــــــــــ
كل الجره اعله آل النبي .. من كسر ضلع الزهره
وكل نار شبوهه العده .. من بابهه المستعره
وكل حرمه هتكوهه وظلم ..واللي جره اعله العتره
من صاح طاغيهم وإن .. ودار الوصي متوجره
◾️هذا الجره ابيوم اهتكَوا دار النبي
◾️والناصبي يتبع اثر للناصبي
والمحسن اعله اعتابه .. ونعلگ شمع لمصابه
ـــــــــــــــــــــــــــــــــــــــــــــــــــــــ
كل المصايب سيدي .. اتهون المصايب عاشور
اهناك الشباب اعله الترب .. ودلّاله يلهب مجمور
اهناك الچفوف امگطعه .. واهنا خضيب او منحور
واهنا مهد وابلا طفل .. وامّه ابگلبهه المكسور
◾️ظامي انذبح گطرة عذب راد الولد
◾️وامّه تلولي للمهد خالي المهد
دم الوريد اخضابه .. ونعلگ شمع لمصابه
ـــــــــــــــــــــــــــــــــــــــــــــــــــــــ
✍🏻بقلم #احمد_الكعبي_الكربلائي
📍كربلاء المقدسة
‏🌐t.me/ahmedAlka...