༄༅། །འཕགས་པ་ཁ་མཆུ་ནག་པོ་ཞི་བར་བྱེད་པ་ཞེས་བྱ་བ་བཞུགས་སོ། ། sonan tashi

Рет қаралды 78,256

Күн бұрын

༄༅། །འཕགས་པ་ཁ་མཆུ་ནག་པོ་ཞི་བར་བྱེད་པ་ཞེས་བྱ་བ་བཞུགས་སོ། །
རྒྱ་གར་སྐད་དུ། ཨཱརྻ་ཁ་དུཾ་དྷརྨ་ཏ་བ་ཡེ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་ པ་ཁ་མཆུ་ནག་པོ་ཞི་བར་བྱེད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་ཅིག་ན། བཅོམ་ལྡན་འདས་ཡུལ་ཀོ་ས་ལ་ན་འཁོར་མང་པོ་ལ་ཆོས་སྟོན་ཏོ། །དེའི་ཚེ་ཁྱིམ་བདག་མཛེས་ལྡན་ཞེས་བྱ་བ་འཁོར་དང་བཅས་ཏེ་འདུས་པར་གྱུར་པ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་མ་སྟོན་པ་བཅོམ་ལྡན་འདས། བདག་ཅག་ཡུལ་འདིར་མཆིས་པ་རྣམས་ལ་རྒྱལ་པོའི་ཆད་པ་དང༌། ཡུལ་གཞན་གྱི་མིས་རྩོད་པ་དང༌། སྐྱེ་བོ་ཕལ་པས་མཚང་འབྲུ་བ་དང༌། དགྲ་རྣམས་ཀྱིས་ཁ་མཆུ་རྩོད་པའི་འཇིགས་པ་དུ་མ་དག་མཆིས་ན། བཅོམ་ལྡན་འདས་ཀྱིས་བདག་འཇིགས་པ་དེ་དག་ལས་སྲུང་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཁྱོད་ཁ་མཆུའི་འཇིགས་པ་ལ་མ་སྐྲག་ཅིག །ཁ་མཆུ་ནག་པོ་ཞི་བར་བྱེད་པ་ཞེས་བྱ་བའི་མདོ་ཡོད་ཀྱི། དེ་ཁྱོད་ལ་རྣམ་པར་ཕྱེ་ལ་བསྟན་པར་བྱའོ། །དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་རིགས་ལྔའི་ལྷ་ལ་ཕྱག་འཚལ་ལོ། །ཨོཾ་ན་མོ་བྷ་ག་ཝ་ཏེ་ཨརྷ་ཏེ། སམྱཀྶཾ་བུདྡྷ་ཡ། ཏདྱ་ཐཱ། ཨོཾ་མུ་ནེ་མུ་ནེ། མ་ཧཱ་མུ་ནེ་རཀྵ། སརྦ་པུཥྚིཾ་ཀུ་རུ་སརྦ་ཏ་ཐཱ་ག་ཏ་ཨ་དྷིཥྛཱ་ན། ཨ་དྷིཥྛཱི་ཏེ། མ་མ་སརྦ་རཀྵ་རཀྵ་སྭཱ་ཧཱ། ཨོཾ་ཁ་དུཾ་རཀྵ། ཨོཾཿ ཁ་མཆུ་སོད། ཏྲ་རཀྵ། ཨོཾ་ཎི་ཝ་ར་ས་ན་རཀྵ། ཧ་ར་ཧ་ར་རཀྵ་རཀྵ་སྭཱ་ཧཱ། ཁྱིམ་བདག་མཛེས་ལྡན་ཁྱོད་ཀྱིས་གཟུངས་འདི་ཆོངས་ཤིག །ལྷོགས་ཤིག །སྟོན་ཅིག །རྒྱལ་པོའི་ཆད་པ་དང༌། རྩོད་པ་དང༌། འཐབ་པ་དང༌། མཚང་འབྲུ་བ་ལ་སོགས་པ་རྒོལ་བ་ངན་པ་ཐམས་ཅད་བཟློག་པར་འགྱུར་རོ། །རིག་སྔགས་འདི་བརྗོད་པར་བྱའོ། །ཏདྱ་ཐཱ། ཨོཾ་བཛྲ་པཱ་ཎི་མ་མ་རཀྵ་རཀྵ། ཨོཾ་བྷྱོ་ཟློག་ཁ་མཆུ་མཱ་ར་ཡ་ཕཊ། ས་མ་ཡ་དུ་རཀྵ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བདག་འཁོར་དང་བཅས་པ་ལ་ཡས་ཀྱི་བདུད་གཡོས་པ་དང༌། ཕ་ཁུའི་བྱུར་འདྲེ་དང༌། དགྲ་བོ་དང༌། ཉེ་དུའི་ལན་ཆགས་དང༌། ལོ་ངན་པའི་སྐེག་དང༌། ཟླ་བའི་སྐེག་དང༌། བཀྲ་མི་ཤིས་པ་དང༌། སྐྱེ་བོའི་རྩོད་པ་དང༌། རྒྱལ་པོའི་ཆད་པ་དང༌། མཚང་འབྲུ་བ་དང༌། ཁ་མཆུ་རྩོད་པ་དང༌། ངན་སེམས་དང༌། བསམ་པ་ངན་པའི་གྲོགས་དང༌། མིག་བལྟས་ངན་པ་དང༌། གདོན་ཐམས་ཅད་བཟློག་པར་འགྱུར་རོ། །སྡང་བ་རྣམས་འདུལ་དུ་གསོལ། ཁ་མཆུ་དང༌། བྱོལ་ཟོར་དང༌། བོད་གཏོང་དང༌། རིམས་དང༌། ལྟས་ངན་པ་ཐམས་ཅད་ཞི་བ་ཤཱནྟིཾ་ཀུ་རུ་ཡེ་སྭཱ་ཧཱ། རིགས་ཀྱི་བུ་ཁ་མཆུ་ནག་པོ་ཞི་བར་བྱེད་པ་ཞེས་བྱ་བའི་གཟུངས་འདི་ནི། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །ངས་ཀྱང་དེ་ལྟར་བཤད་པར་བྱའོ། །འདི་རབ་ཏུ་བཟུང་ལ་རྒྱུན་དུ་ཐོན་ཅིག །འཇིགས་པ་ཐམས་ཅད་སེལ་བར་འགྱུར་རོ། །ཁ་མཆུ་དང་ལྟས་ངན་པ་ཐམས་ཅད་བཟློག་པར་འགྱུར་རོ། །ནད་དང་གདོན་དང༌། འབྱུང་པོ་དང༌། །ལོ་སྐེག་དང༌། ཟླ་སྐེག་དང༌། མོ་ངན་པ་ཐམས་ཅད་ཞི་བར་འགྱུར་རོ། །དེ་ནས་བྱང་ཆུབ་སེམས་དཔའ་འཇམ་དཔལ་སྟན་ལས་ལངས་ཏེ། བཅོམ་ལྡན་འདས་ཀྱི་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་བཟུང་བར་བགྱི་ཞེས་གསོལ་པ་དང༌། བཀའ་སྩལ་པ། འཇམ་དཔལ་འདི་ནི་ཁ་མཆུ་ནག་པོ་ཞི་བར་བྱེད་པ་ཞེས་བྱ་བ་ཟུངས་ཤིག །དེ་ནས་འཇམ་དཔལ་གྱིས་གསོལ་པ། ལེགས་སོ་ལེགས་སོ། །བཅོམ་ལྡན་འདས་མདོ་སྡེ་ཟབ་མོ་འདི་འཆང་བ་དང་ཀློག་པའི་མི་དེ་ལ་བདག་གིས་བསྲུང་བར་བགྱིའོ། །བསྐྱབ་པར་བགྱིའོ། །སྨྲ་བ་ན་ཚིག་རྩུབ་ཐུབ་པར་བགྱིའོ། །བཀའ་སྩལ་པ། གང་ཞིག་གཞན་དང་ཁ་མཆུ་རྩོད་པའི་ཚེ། མདོ་འདི་ལན་བདུན་བཀླགས་ཏེ། འཕགས་པ་འཇམ་དཔལ་ཡིད་ལ་བསྒོམས་ཏེ་སོང་ན། ཕ་རོལ་གྱི་རྩོད་པ་ཐམས་ཅད་འཇོམས་སོ། །རང་གི་ཚིག་བཙུན་པར་འགྱུར་རོ། །སྨྲས་པ་ལ་གཞན་ཡིད་ཆེས་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་བསྩལ་ནས། ཁྱིམ་བདག་མཛེས་ལྡན་དང༌། འཁོར་ཐམས་ཅད་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཁ་མཆུ་ནག་པོ་ཞི་བར་བྱེད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།