СВЯТОЙ ПРЕПОДОБНЫЙ МАКАРИЙ, ИГУМЕН КАЛЯЗИНСКИЙ, ЧУДОТВОРЕЦ.

#Православие, #Христианство, #русскийсвятой, #ПреподобныйМакарийКалязинский, #житиясвятых, #житиеПреподобногоМакарияКалязинского, #СвятойпреподобныйМакарийКалязинский, #ПреподобныйМакарийигуменКалязинскийчудотворец
Тропарь:
Плотска́я мудрова́ния, о́тче Мака́рие, воздержа́нием и бде́нием умертви́л еси́, ме́сто бо, на не́мже по́ты твоя́ излия́л еси́, я́ко труба́ вопие́т к Бо́гу, пове́дающи твоя́ исправле́ния, и по сме́рти честны́я твоя́ мо́щи источа́ют исцеле́ния. Те́мже вопие́м ти́: моли́ Христа́ Бо́га, да спасе́т ду́ши на́ша.
Кондак:
Вы́шних жела́я, воздержа́нием и труды́, и по́ты наслади́вся, жела́ние пло́ти твоея́ обузда́в, чуде́с дар прие́м от Христа́ Бо́га, свети́льник яви́лся еси́ пресве́тлый. Те́мже Христо́ва Це́рковь пе́сньми сла́вит тя, преподо́бне Мака́рие, о́тче наш.
Молитва:
О свяще́нная главо́, преподо́бне о́тче, преблаже́нне а́вво Мака́рие! Не забу́ди убо́гих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до свое́, е́же сам упасл еси́, и не забу́ди посеща́ти чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́. Не промолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас, недосто́йных, у Престо́ла Вседержи́телева, и не преста́й моля́ся о нас ко Христу́ Бо́гу: и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих, и вся́кия пре́лести бесо́вския, и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда, но свята́я твоя́ душа́ с а́нгельскими во́инствы, с безпло́тными ли́ки, с Небе́сными Си́лами у Престо́ла Вседержи́телева предстоя́щи, досто́йно весели́тся. Ве́дуще бо тя вои́стину и по сме́рти жи́ва су́ща, тебе́ припа́даем и тебе́ мо́лимся: е́же моли́тися о нас Всеси́льному Бо́гу о по́льзе душ на́ших и испроси́ти вре́мя на покая́ние, и о невозбра́нном преи́тии от земли́ на Не́бо, мыта́рств же го́рьких, бесо́в возду́шных князе́й и ве́чныя му́ки изба́витися, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́: Ему́же подоба́ет вся́кая сла́ва, честь и поклоне́ние со Безнача́льным Его́ Отцо́м, и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.