TALASSEMİYA XƏSTƏLİYİNİN MÜAYİNƏSİNDƏ İNQİLABİ YENİLİK

Talassemiya xəstələrinin müayinəsi yeni, daha asan üsulla mümkün olacaq. Talassemiyalı xəstələrə mütəmadi olaraq qan köçürüldüyündən bədənin dəmirlə yüklənmə dərəcəsini yoxlamaq lazım olur. Azərbaycan Tibb Universitetinin Histologiya və Stomatologiya kafedralarının mütəxəssislərinin araşdırmaları sübut edib ki, bunu diş ətindən götürülən nümunə ilə də müəyyənləşdirmək mümkündür.
Azərbaycanın elm adamları ilk dəfə olaraq ferritin molekulunda baş verən dəyişiklikləri mikroskopik tədqiqatların nəticələrinə əsasən dəqiqləşdirilə bilib. Bu elmi yenilik talassemiyanın ağır formasından əziyyət çəkənlər üçün xüsusilə önəmlidir.
Mütəxəssislər bu yenilik barədə dünyanın aparıcı elm jurnallarında məqalələr dərc etdirməyə hazırlaşır. Artıq tərcümə prosesində olan iki məqalə ilin sonunadək bu jurnallara təqdim olunacaq.
Talassemiya qanda hemoqlobin istehsalı zamanı yaranan zülal çatışmamazlığıdır. Bu zülal qırmızı qan hüceyrəsində olmaqla oksigeni ağciyərlərdən bütün bədən hissələrinə daşıyır. Talassemiya xəstəliyi olan insanlarda hemoqlobin zəncirindən biri olmur. İrsi olan bu qan xəstəliyi əsasən Aralıq dənizi hövzəsində geniş yayılıb. Bu ilin aprel ayında Respublika Talassemiya Mərkəzinin açıqladığı statistikaya əsasən, Azərbaycanda 2959 talassemiyalı xəstə dispanser qeydiyyata salınıb. Son illər Azərbaycan səhiyyəsi talassemiya xəstəliyi ilə mübarizə sahəsində uğurlara imza atıb. Bunlardan biri xəstələrin tam sağalmasına səbəb olan sümük iliyinin köçürülməsi əməliyyatının ölkəmizdə gerçəkləşdirilməsidir.
Azərbaycan alimlərinin son araşdırmasının nəticəsi də talassemiyanın müayinə və müalicəsində böyük uğur sayılır. Bu, həm də dünya səhiyyəsində nəzərə çarpan yenilikdir.