Рет қаралды 97,326
久違嘅家姐系列重出江湖,今集玩大啲,跟住台灣家姐喺台北搵食!邊位家姐咁厲害?非常榮幸邀請到狄達做我哋今集嘅嘉賓~狄達喺台灣生活超過8年,佢經營嘅KZbin頻道有超過178K訂閱,經常分享台灣嘅日常生活同最強美食,最近出埋台灣旅遊書,絕對係台灣地膽家姐。想知2023依家台北潮甚麼?嚟台北一定要做邊幾樣嘢?一齊跟住狄達嘅口袋名單推薦,快啲去片啦!
完整影片,今晚9點KZbin睇片
1. 第一站我哋嚟到迪化街打卡影相。呢度嘅紅磚平房建築古色古香,好似停留喺幾十年前嗰種古典氣息,有唔少百年傳統老店同文青食店,仲有一間月老廟添,好多台灣本地人,專登嚟買布料同果乾。不過據狄達講,原來呢度嘅大稻埕遊客中心,提供一個特別嘅服務,就係可以租借旗袍!就好似去京都換上和服咁,等大家喺咁古雅嘅大街打卡。不過,要租用旗袍必須預先預約,由於出發前兩星期早就full booking,所以我哋決定自己旗袍自己帶,同狄達一齊著住旗袍,喺迪化街打卡,感受台灣嘅文化氣息!當然即場嚟個影相battle大對決,誰勝誰負,就交俾觀眾決定啦~
預約方法:大稻埕遊客中心網站
travel.taipei/...
2. 著完旗袍打完卡,第二件事就係要去大稻埕碼頭貨櫃市集,呢度設有好多美食貨櫃車,係樓下買完食物,就可以行上去貨櫃車頂坐底慢慢嘆~如果撞正日落時間,仲可以一邊享受美食,一邊望住河景同夕陽,好chill呀~如果大家嚟開迪化街,記住要預啱時間,嚟大稻埕碼頭chill吓喇~
3. 嚟到台北,點少得去西門町,不過今次唔係嚟食嘢,狄達話而家最hit就係影貼紙相,而西門町呢度相紙機就最多最集中!本身喺台灣影貼紙相非常平,今次影嘅仲要係用透明相紙,有唔同嘅排列格式揀,最推介「人生4格」,簡直擊中少女心臟,2位少女表示影得好滿意!
THE FILM Seoul (西門町店)
地址:台北市萬華區武昌街二段48-1號2樓
4. 狄達身為台灣家姐,梗係要叫佢帶我去買手信啦~第一間推介嘅手信鋪,就係七見櫻堂,主打超鬆化夾心餅乾,多款口味選擇,個人覺得佢哋嘅茶味夾心餅好出色!鐵觀音、台灣包種茶……茶味香,甜而不膩,好食!另一間板橋之光小潘鳳梨酥,佢哋嘅鳳梨酥同鳳凰酥,真係好食得太誇張,鳳凰酥有俾佢驚豔到!外皮酥軟,內餡包咗鹹蛋黃同鳳梨,鹹鹹甜甜嘅配搭真係好啱我口味!下次嚟台北買手信識得點買了,小潘鳳凰酥世一!不過,要買得醒目係有秘訣,呢度有分裸裝同獨立包裝,而祼裝仲要係平啲,好味好多!
七見櫻堂
地址:新北市板橋區民生路二段240巷34號
小潘蛋糕坊
地址:新北市板橋區中正路135巷11-1號
5. 嚟到台灣點可以唔去夜市!狄達就好鍾意去南機場夜市,因為短短一條街,有好多臥虎藏龍嘅老字號店家,必食有瓜仔肉飯、排骨酥湯、水餃仲有超巨型刨冰,每一樣食物都鬼咁好食!下次嚟台灣唔好淨係去士林夜市啦~
南機場夜市
地址:台北市中正區中華路二段307巷
*特別鳴謝台灣家姐狄達
ig@tiktokyin
KZbin @DiDa324
撰文、主持:Yvonne Lam
攝影:Doris Wong
剪接:Fong Ka Him
美術:Anita Lam
TalkFood 先填飽肚子再前進
KZbin: / talkfood
Facebook: / talkfood
Instagram: / talkfood
全自費真實食評,內容反映當日質素,並非廣告!最新價格以餐廳為準。
#台灣 #台灣美食 #台灣旅行 #大稻埕 #迪化街 #旗袍 #打卡 #月老廟 #西門町 #貼紙相 #台灣手信 #七見櫻堂 #板橋小潘蛋糕坊鳳梨酥 #夜市 #南機場夜市 #狄達 #TalkFood #TalkFood台灣 #家姐系列 #18區搵食
延伸閱讀:
【#18區搵食-TF衝出香港 下集台灣繼續食!狼狽落大雨赤腳行】
• #TalkFood【#18區搵食-TF衝出香...
【#18區搵食-TF衝出香港!去台灣6日食足23餐】
/ cve7u0dohmo