Талоқ бо амри хушдоман

Зиёд шудани талоқ ва пош хӯрдани оилаҳо солҳои охир яке аз мушкилиҳои ҷомеаи мо маҳсуб ёфта, бар асари пошхӯрии оила кӯдакони зиёде зиндаятим мемонанд.
Маъмулан баъди талоқ вазъи иқтисодии занон хеле мушкил гашта, бо фарзандони зиндаятимашон бо душвориҳои зиёде рӯ ба рӯ мегарданд. Вайроншавии оила ва канда шудани муносибатҳои занушавҳарӣ сабабҳои зиёде дорад, ки яке аз онҳо дахолати хусуру хушдоман ба зиндагии зану шавҳари ҷавон аст. Кам нестанд ҷавонмардоне, ки бо амри модар ҳамсарашонро талоқ дода, аз баҳри зану фарзандони худ гузаштаанд.
Қаҳрамони имрӯзаи мо Марҳабоаз зумраи заноне мебошад, ки бо ҳукми хушдоман талоқ гирифтааст. Ба гуфти худи ҷавонзан, дар аввал муносибати модаршӯяш бо ӯ чандон бад набудааст, вале баъди чанд моҳ шавҳараш шикоят мекунад, ки ту ба модарам писанд аслан нестӣ ва ҳамин тавр байни онҳо дилсардӣ ба миён меояд.
Идигул Раҷабова, ки соҳиби ду келин ва домод аст, нисбати ин масъала назари мухолиф дорад. Ӯ мегӯяд, ягон модар намехоҳад, ки зиндагии фарзандаш вайрон шавад, вале таҷрибаҳо нишон медиҳанд, ки хушдоманҳо ба зиндагии келинҳо аз ҳад зиёд дахолат мекунанд.
Тибқи омори Вазорати адлияи кишвар дар соли 2022 дар ҷумҳурӣ 13 876 ҳолати бекор шудани ақди никоҳ ба қайд гирифта шудааст. 15 412 кӯдакони ноболиғ бар асари пошхӯрии оила ва ҷудо шудани падару модарашон зиндаятим гаштанд.