THUKATHAN DAYEKA CHONGU DU JANBAHA DYO YA RATHYA GHAA CHAA

THUKATHAN DAYEKA CHONGU DU JANBAHA DYO YA RATHYA GHAA CHAA
VIDEO EDITED & NARATION BY : LALENDRA SHAKYA
#janbaha dhyo#_#seto machhindra nath jatra#_#ghaa chaa#_#newa culture#
थुकथं दयेकाच्वंगु दु जनबहाःद्यःया रथया घःचाः
थ्व खः, न्हूगु जनबहाःद्यःया रथया घःचाः (फोटो)
थ्व घःचाः दयेकेगु नितिं गुथि संस्थान येँ शाखां थौंकन्हय् येँया कोटेश्वरय् च्वंगु सगरमाथा काष्ठ उद्योगय् सिँ चायेगु ज्या यानाच्वंगु दु । (भिडियो)
वंगु निदँ न्ह्यः निसें सेतो मच्छिन्द्रनाथ रथजात्रा व्यवस्थापन समितिं जनबहाःद्यःया रथय् घःचाः हिलेमाल धकाः माग यानाः वयाच्वंगु खःसा थ्यंमथ्यं निदँ लिपा गुथि संस्थानं थथे घःचाः हिलेगु ज्या याःगु दु ।
गुथि संस्थानया प्रशासकीय प्रमुख किरण शाक्यया कुतलय् थथे थुगु दँया जात्राय् जनबहाःद्यः रथया घःचाः हिलेगु ज्या ताःलायेत्यंगु खनेदु ।
प्रशासकीय प्रमुख शाक्यं धार्मिक महत्वया जात्रापर्वन्यायेकेगु रथया घःचाःत हिलेमाःगु अवस्थाय् थ्यन धकाः सम्बन्धित सरोकारवालापिन्सं माग याःसां थथे हिलेगु नितिं ताःहाकःगु प्रक्रियाय् वनेमाःगु जानकारी बियादीगु दु ।
वय्कलं जनबहाःद्यःया रथया घःचाः हिलेगु खँ पिनें स्वयेबलय् सामान्य खःसां थ्व प्रक्रिया ताःहाकःगु जूगु खँ कनादिसें गुथि संस्थानं यक्व न्ह्यः हे संस्कृति मन्त्रालयस थथे घःचाः हिलेमाःगु व उकिया नितिं माःगु सिँ व्यवस्था यायेमाल धकाः निर्णय यानाः टिप्पणी छ्वयागु खः । थथेछ्वःगु निर्णय संस्कृति मन्त्रालय नं मन्त्रिपरिषदया बैठकय् यंकाः पास यायेधुंकाः सिँ कायेगु नितिं बन मन्त्रालययाके स्वीकृति कायेधुंकाः तिनि सिँ हयेगु ज्या जूगु खँ कनादीगु दु ।
थुगु सिँ वंगु फागुन ८ गते कैलालीया जंगलं येँय् हःगु खः । थ्यंमथ्यं १२ बाई १२ या सिँग्वः येँय् हयाः चायेगु ज्या न्ह्याकूगु खः ।
जनबहाःद्यःया रथया घःचाः न्ह्याम्हेस्यां नं दयेकेफइगु स्थिति मदुनि । आः नं थथे रथ निर्माणया ज्या यलया बाराही समुदाय नं यानाः वयाच्वंगु दु ।
गुथि संस्थानं बाराही समुदाययात थथे रथया घःचाः दयेकेगु भालाः बिइधुंकाः आः थुकी अनुगमन यायेगु ज्या सेतो मच्छिन्द्रनाथ रथजात्रा व्यवस्थापन समितिं यानाच्वंगु दु ।
छुं दिं न्ह्यः जक व्यवस्थापन समितिया नायः लिसें जनबहाःद्यःया गुरुजु निलकाजी शाक्य, दुजःपिं सुजीव बज्राचार्य, मचाराजा महर्जन, गणपतिलाल श्रेष्ठ, अमित बज्राचार्य, रवि श्रेष्ठलिसेंया पुचलं घःचाः दयेकाच्वंगु ज्यायात कयाः निरीक्षण यानादीगु खः ।
उगु निरीक्षण लिपा समितिया नायः निलकाजी शाक्यं थःगु नुगःखँ थुकथं तयादीगु दु । (भिडियो)
थुगु दँय् येँया तःधंगु रथजात्रा जनबहाःद्यःया रथजात्रा थ्वहे वइगु बैशाख ५ गतेनिसें न्ह्यायेत्यंगु दुसा गुथि संस्थानं चैत्र २० गतेपाखें न्हूगु घःचाः तयार जुइगु बचं ब्यूगु दु ।
जनबहाःद्यःया रथजात्रा येँया दकले तःधंगु जात्रा खःसा थुगु रथजात्रा न्ह्यायेवं हे देय् न्यंकंया थीथी लागाय् रथजात्रा न्ह्याकीगु परम्परा दु ।
आशा याये, थुगु दँनिसें न्हूगु घःचाः दुथ्याकाः जनबहाःद्यःया रथजात्रा स्वयेदइ ।