Title : Aw Nang Goldei nu : Thadou- Kuki , a Song by Thangjamang Maneithangza Kipgen

Aw Nang Goldei nu : Jaila hi Gam leh Nam boina jal in gollhangpa chun adongmanau leh khomi phabep chu inn leh lou dalha in pummei liang in a kivat in gammang noi lam ana ajot pi tai. Gollhang pa chun amolpang lep un gammangnoi ja chun lunggel khat aneitai. Gammangnoija pahcha lingtam tah khat in abop pahcha hoitah khatchu akhut thi kaijengjung in agalou vin akhut langkhat ah apummei( Kolthong) achoijin akhut langkhat ah apahcha chu achoijin ahung peh un loubuh ahin phah un akicholtaove. Hichun gollhangpa chun a pahcha chu ahin ladoh in agoldeinu chu apetai. chu in nungah nu chun heo idinga neipeh ham atileh Gollhangpa'n hichi pahcha hi kichoijin lang hilaija hin neina ngah in, ijem tia kumkhat tokah a kahung kilelouleh gal hi akhohse tai ti ana he inlang , na u keima hi athitai tin anageltan, chuteng nangma jong nadei nangai cha gollhang aum khah jongleh kiphalam loubeh in ana kiengneitan, hinlah hichi pahcha vang hi mansah hih in nakiengnei na nikho teng leh vangchu ana goplha tantin ana muoltante, hinlah nachintup a hichi nikho nichanna chu keima mel leh kalhagao banga nagel a nana tahlah kit a neilungsetna mitlhi tua ikikhen konna namitlhi lon bang a hi nageldoh kitna namitlhi vatkhat beh hijongleh na u keija dinga ahung vatlhah kit leh keiman jong neilungsetna hi alembei ahi tinting vanthamjolla kon hung phinlha daitui bang in sangnang nge neingailutna mitlhi lon tin availhah in hichi lubuh mun melmaten ahung suhboiphah joulou nadiu munpha ahijeh chun hichi munpi achun a goldeinu leh khomi phabep hochu adalha in galmun lam chu amano tan ahi.
kumkhat jouvin galsat ding golhang phabep khat galmunlam jon in akitol lut kit taove, hichun nungahnu chun a goldei tangpa kom lhungding chun gollhangho kom achun kangah jinge tin neihin seipeh tei tei un tin ngailut na thu athotkitne. Kumni lhinjou vinjong a golngaipa chu ahung kile mong mong tapoi. Nungahnu chun lung liangvai tah in hinkho amang tai, Kumthum lhinna in nungah nu hi gollhang khat in ahin heltai, amajong amitlhi longpum in pathen kom ah ataovin adongtai. A goldeipa pahcha chula amuol gamtan, kigellha mokeijin jingkah nilhah in a pahcha chu aladoh jiji in ajut in aveve ji in akap kap tai......
to be continued/-