ТОД МАГНАЙ ПОДКАСТ №85

Өглөөний мэнд.
Өнөөдрийн ажил үйлс тань сэтгэлчлэн бүтэх болтугай. Ирэх долоо хоногийн зочноо танилцуулдаг ээлжит постоо бичиж сууна.
6-р сарын 20-ны даваа гарагийн 11 цагт үзэгч, сонсогч та бүхэнд хүрэх "Тод магнай" подкастын зочин бол Сүхбаатар аймгийн Халзан сумын харьяат, Монгол Улсын Алдарт уяач Энэбишийн Ууганбаяр байх болно.
Сайн аавын буян, шандаст хүлгүүдийн хийморь, уяачийн эрдэм, ид хаваар гайхуулан унаган хүлгүүдээ төрийн зарлигт наадмуудад түрүүлгэж айрагдуулж буй энэ эрхэмтэй "Жавхлант шаргын хурд" уралдааны дундуур ажлаа завчлан ярилцсан нь энэ билээ.
Яагаав нөгөө "Түмний эх" студийн залуучуудыг буудлын коридорт унтуулан байж авсан ярилцлага маань.
Миний бие хөдөө орон нутагт явахдаа ажлаа завчилж байгаад ганц ч гэсэн илүү ярилцлага, материал авахыг хичээдэг юм. Тэр ёсоор Жавхлант шаргын хурдыг завчлан авсан хоёр дахь подкаст маань үзэгч та бүхэнд хүрч байна.
Энэ дашрамд тав тухтай орчныг бүрдүүлэн дэмжсэн Сүхбаатар аймгийн МСУХ-ны тэргүүн Т.Баярхүү танд талархал илэрхийлж, цаашдын ажил үйлсэд нь амжилт хүсье ээ.
Алдарт уяач Э.Ууганбаярын оролцсон "Тод магнай" подкастыг үзэхийг хүсвэл 6-р сарын 20-ны даваа гарагийн 11 цагт "Тод магнай" пэйж болон Юүтүбийн Долгион сувагт хандаарай.
Эрхэм та бүхнийг морин эрдэнийн хийморь тэтгэх болтугай.