Trailer - "Qyteti im evropian, edicioni 8"

Në mjediset e Pallatit të Kulturës në Peshkopi u hap të shtunën ekspozita e arteve pamore e 35 talenteve të reja nga Bashkia Dibër.
Ekspozita e titulluar “Qyteti im evropian” është shprehje përmes gjuhës artistike e qytetit ideal, se si të rinjtë e perceptojnë dhe e kuptojnë zhvillimin e qëndrueshëm urban, planifikimin, ndotjen e mjedisit, ngrohjen globale e ndryshimet klimatike, ruajtjen e vlerave të trashëgimisë etj.
Autorët prezantuan punimet e tyre, fabulën dhe teknikat e përdorura, duke e shndëruar bashkimin e forcave krijuese në një hapësirë të lirë dhe të sinqertë diskutimi mes tyre.
Ky ishte edicioni 8 i projektit “Qyteti im evropian”, të cilin ABC Tirana Club e ka organizuar prej 1 qershorit të vitit 2021 edhe me talentet e reja në Tiranë, Korçë, Mat, Tepelenë, Kukës e Gramsh. Në këto ekspozita, si në formën e një stafete artistike, janë angazhuar deri më tani 469 talente të reja.
Sipas organizatorëve “Qyteti im evropian” nuk do të ndalet, pasi do të afrojë sërish krijues të rinj edhe nga njësi të tjera administrative të vendit, deri dhe ato më të largëtat, për t’i promovuar dhe për t’i motivuar që të vijojnë të ecin në rrugën e bukur e të vështirë të artit.
Ekspozita e 35 talenteve të reja nga Bashkia Dibër u financua nga Ministria e Ekonomisë, Kulturës dhe Inovacionit. Autorët e punimeve ishin nga shkolla 9-vjeçare “Irfan Hajrullai” dhe shkolla e mesme profesionale: Alsi Rama, Amelia Menga, Amelja Begu, Anastasia Dopa, Andia Vishka, Anja Tomçini, Artenis Osmani, Bademe Met’hasani, Dean Izvira, Elisjo Islami, Endi Daci, Enea Stërmilli, Erda Kaba, Erga Shahu, Erkida Vraniçi, Inseda Shehu, Irida Zebi, Klea Vraniçi, Klejda Elezi, Luena Daci, Olta Gjegja, Onajda Korumi, Orestia Gjegja, Ornela Met’hasani, Rahim Istrefi, Rea Tusha, Reida Izvira, Rejan Cani, Rejan Hysa, Rueida Kryemadhi, Sadete Saraçi, Siera Gjeçi, Uendi Dumani, Uesila Kryemadhi dhe Vesa Nuredini.