Рет қаралды 11,304
Լոռվա և Տավուշի մարզերի՝ ջրհեղեղից տուժած բնակավայրերը աղետի գոտի են ճանաչվել։ Դեբետ գետի մակարդակն այսօր արդեն իջել է, առաջնային շոկը՝ մեղվել։ Ալավերդցիներն անցել են ռեզինից կոլոշների։ Մոտակա բնակավայրերից եկած կամավորների հետ միասին նրանք փորձում են մաքրել ջրհեղեղից մնացած տիղմը՝ խանութներից, բակերից, սեփական տներից, բազմաբնակարան շենքերի առաջին հարկերից, նկուղներից, գարաժներից, փողոցներից։ Ալավերդու երկու թաղամասերը մեկուսացման մեջ են։ Կամուրջները փլվել են։ Պաշարված ժողովրդին սնունդ են մատակարարում տրոսներով։ Քաղաքի կենտրոնում շրջում են երևանցի չինովնիկները, մարզպետարանի աշխատակիցները, տեղացի հանքահանները՝ տպավորություն ստեղծելով, թե ամեն ինչ վերահսկողության տակ է գտնվում, բնակիչներին հուզող հարցերն էլ շուտով կլուծվեն։
Մարզի մոտ 7 բնակավայրեր առ այժմ էլ շրջափակված են։ Ոչ ոք չգիտի՝ երբ են վերականգնվելու քանդված կամուրջներն ու ճանապարհները։ Մասնավոր սեփականություն կորցրած մարդիկ սպասում են փոխհատուցմանը վերաբերող որոշումներին։ Քաղաքում վիճում են պատճառների մասին՝ տասնամյակներ շարունակ գետն արհեստականորեն նեղացվել է ճանապարհ գցելու համար, իշխանությունների արտոնմամբ ափեզրերին ապօրինի շինություններ են կառուցվել, ՀԷԿ-երը վերջերս դադարել են ջուր քաշել, անվտանգային նախկին ենթակառուցվածքները քանդվել են, նորերը չեն ստեղծվել․․․