Вечното почивалиште на Григор Прличев (Црква Света Богородица Перивлепта, Охрид)

Гробот е сместен зад црквата „Пресв. Богородица Перивлептос“ на понискиот рид Дебој. Во него почиваат истакнатиот македонски преродбеник Григор Прличев (1830 - 1893) и неговиот син, револуционерот и општественик Кирил Прличев (1875 - 1944). Гробот е прогласен за културно наследство на Македонија.
-
Григор Прличев бил македонски писател и значаен претставник на македонската литература од 19. век. Овој генијален литерат според јазичната припадност е тродомен автор: грчки, бугарски и македонски, и ги обединува во себе нивните специфични карактеристики и епохата во која живее и работи, класицизмот и романтизмот, како стилски белези.
Во основно училиште Прличев бил ученик на Димитар Миладинов. Во 1849 година се запишува како студент на Медицинскиот факултет во Атина, но никогаш не дипломирал. Се враќа во Македонија и работи како учител во неколку градови. По 10 години повторно оди во Атина да ги продолжи студиите, и се пријавува на атинскиот конкурс за најдобра поема на грчки јазик.
Со поемата „Сердарот“ (Ο ΑΡΜΑΤΩΛΟΣ) тој го освојува првото место, ловоровиот венец, паричната награда и прогласен е за „Втор Хомер“ (1860). Веднаш следната година се пријавува на истиот конкурс со поемата „Скендер-бег“, но конкурсот не се одржува. Дознава за смртта на браќата Миладиновци, ја напушта Атина, се враќа во Македонија и од тогаш, па сè до крајот на животот, Прличев се бори за популаризирање на словенското писмо. Поради тоа е прогонуван и затворен во дебарскиот затвор.
Во 1871 година ја препејува Хомеровата „Илијада“, но разочаран од критиките не ја објавува. Во периодот од 1883-1890 година живее и работи како учител во Солун, каде ја пишува својата „Автобиографија“, прво македонско прозно дело од ваков тип. Последните години од својот живот Прличев ги поминува во родниот град Охрид и целосно ги посветува на својата татковина.