Рет қаралды 14,965
由羅嘉駿(Steve)身兼監製和導演,黃智揚編審,廖子妤、楊樂文(Lokman)、陳健朗、李敏、張可欣、陳書昕、林漢忠和鄭學謙主演的ViuTV新劇《十七年命運週期》於9月23日正式首播,故事以香港兩次疫情(2003年沙士疫情和2020年新冠疫情)為背景,講述「蕃茄」陶嘉韜(廖子妤飾,張可欣飾年輕時期)和其他人物兩個時期下的成長與命運交織。日前,Steve接受本平台專訪暢談新劇特別之處,不但大爆《十七年命運週期》名字的由來,更分享了選角經過,以及創作的心路歷程。
原來《十七年命運週期》起初不是叫《十七年命運週期》?Steve在專訪中透露劇集本身叫《十七年惡運週期》,但是上頭強烈反對:「佢問我係咪玩嘢,即係驚廣告商唔肯落廣告,跟住我suggest《十七年惡夢週期》得唔得呀,發個夢啫,都唔得,所以就叫《十七年命運週期》,件事mild啲。」至於英文名《Cicada Cycle》,則是「GPT大神」的手筆:「我問ChatGPT,話我哋有套戲個中文名叫《十七年命運週期》,英文名叫咩好,佢就答《Cicada Cycle》,然後我就問佢係咩嚟,佢就話呢個世界有有種蟬,叫17年周期蟬,喺美國嘅,佢一出世就會潛伏咗喺泥土入面,然後17年後佢先會孵化,再交配,幾億隻一齊嘅,然後就全部一齊死,即係佢哋嘅『蟬生』就係為咗等待17年之後呢一刻,我哋就即刻覺得『嘩,如獲至寶呀』!」
《十七年命運週期》中,2003年沙士疫情和2020年新冠疫情各佔一半篇幅,所以除了經驗相對豐富的廖子妤、李敏、Lokman和陳健朗之外,四位新演員--張可欣、陳書昕、林漢忠和鄭學謙在「過去」的故事線內都有大量發揮空間。新演員全是經公開招募方式找來,Steve透露當時收到逾1000封申請,而最重戲份的的張可欣本身更是一早被foul出局:「本身覺得唔好,太細個同太冇經驗,但去到臨開拍嘅一個月都仲未搵到時,我哋就撈番佢出嚟,叫佢casting試下佢啲戲,咁一cast呢,就發覺果然都係唔識做戲嘅!」最後經演出指導毛曄穎調教一番後,張可欣演技大有改善:「完全係另一個人!當然啦,都係有好多難度,例如開心場合佢做得比較唔好,反而唔開心場合就做得好好,即係我哋要不斷NG,拍十幾take下下都,喺劇集嚟講好奢侈,但我哋就係盡量拍,拍到有為止。」
《二月廿九》好評滿載,《940920》反應兩極,今次《十七年命運週期》是否已經準備好心情接受網民評論洗禮?Steve坦言已經對評價變得沒有所謂,因為自覺新作的商業性元素未及《二月廿九》豐富:「但今次故事嘅感情投入,即係人物描寫,我覺得係三套入面最好嘅,我自己係好滿意個故事,只係唔係好滿意個製作,因為真係太趕急。」例如有不少「甩漏」,又例如好多想拍的東西未有拍到:「好似成套劇第一場戲,我係想book機場嚟拍,但機場嗰邊,喺我哋申請咗三個月之後,都係reject我哋,冇辦法,只可以另覓出路。」另外,Steve在專訪都有提到「穿越KOL」吳海昕會否客串演出,自己對行業的看法,以及如何揀選其他演員,想知答案就切勿錯過足本訪問喇!
拍攝:何駿軒
剪接:陳俊文
游大東化妝:Kyo Lee
(25092024)