Рет қаралды 161
کۆنفڕانسی زانستی نێودەوڵەتی "خوێندنەوەیەکی مەعریفی لە زانستە مرۆییەکان و کۆمەڵایەتییەکان" بەڕێوەچوو:
رۆژی دووشەممە 5ـی ئابی 2024، بە ئامادەبوونی بەڕێز هەڵگورد شێخ نەجیب سەرپەرشتیاری ئیدارەی سەربەخۆی سۆران ،بەڕێز پ. ی. د.شێروان شەریف سەرۆکی زانکۆی سۆران ، ڕاگری فاکەڵتی ئاداب و سەرۆکی دەزگای زەکەوات، پێنجەمین کۆنفڕانسی زانستی نێودەوڵەتی "خوێندنەوەیەکی مەعریفی لە زانستە مرۆییەکان و کۆمەڵایەتییەکان" بەچاودێری فاکەڵتی ئاداب لە زانکۆی سۆران، دەزگای زەکەوات بۆ ڕۆشەنبیری و هزر و هونەر و گۆڤاری نێودەوڵەتی تەسنیم بۆ زانستە مرۆیی و کۆمەڵایەتی و یاساییەکان، لە زانکۆی سۆران بەڕێوەچوو.
لە کۆنفڕانسەکەدا هەڵگورد شێخ نەجیب سەرپەرشتیاری ئیدارەی سەربەخۆی سۆران وتارێکی پێشکەش کرد و باسی لە گرنگی ڕۆڵی زانستە مرۆییەکان و کۆمەڵایەتییەکان کرد لە ژیانی تاک و کۆمەڵدا ،بەتایبەت لە دۆخی ئێستادا و رایگەیاند، "زانستە مرۆییەکان و کۆمەڵایەتییەکان دەتوانێ رۆڵی گرنگ بگێڕن لە داڕشتنی ستراتیژی و سیاسەتی دروست بەتایبەت لە رێگەی ئەنجامدانی توێژینەوەی زانستی".
سەرپەرشتیاری ئیدارەی سەربەخۆی سۆران گوتیشی: "لە ئیدارەی سەربەخۆی سۆراندا بۆ زۆرێک لەو کێشە و ئالنگاریانەی رووبەڕوومان دەبنەوه دەتوانین سوود لە زانستە مرۆییەکان و کۆمەڵایەتییەکان وەربگرین بۆ چارەسەرکردنی بەشێک لە گرفتە کۆمەڵایەتییەکانمان".
سەرپەرشتیاری ئیدارەی سەربەخۆی سۆران ئەوەی راگەیاند، "پێویستە ئەو پەیوەندی و هەماهەنگیە بەهێزەی کە بنیاد نراوە لە نێوان زانکۆی سۆران و ئیدارەی سۆران ببرێتە ئاستی قۆناغێکی پێشکەوتووتر".
لە کۆتاییدا سەرپەرشتیاری ئیدارەی سەربەخۆی سۆران هیوای سەرکەوتنی بۆ ئەنجامدەرانی کۆنفڕانسەکە خواست و هیواشی خواست پێشنیار و دەرئەنجامەکانی ئەم کۆنفڕانسە سودێکی بەرچاوی هەبێت هەم لە بواری زانستە مرۆییەکان و لە بواری کاری هاوبەشی ئیدارە و دەزگا ئەکادیمییەکان.
راگەیاندنی ئیدارەی سەربەخۆی سۆران