Рет қаралды 118,154
درس النهارده أعظم فرصة في حياتك وحياتِك
درس النهارده مش بس عن أعظم فرصة..
عن آخر فرصة للأسف الشديد.
عشان نتكلم بصراحة قبل ما ندخل في الموضوع
لو طبيب راح يكشف على مريض، فبيكشف على المريض لقى فيه دور برد، بيكشف أكتر لقى قرحة في المعدة، بيكشف أكتر لقى فيه سرطان! الدكتور هيترعب من أي مرض أكتر؟ وهينبّه المريض وأهل المريض من أي مرض أكتر؟ طبعًا السرطان.. يبقى إذن أخطر مرض لازم ننبّه الأمة كلها منه دلوقت..
إيه أخطر مرض بقى في حياتنا؟
إيه أخطر مرض بقى في قلوبنا؟
إن احنا ماعدناش فاكرين الآخرة، إن احنا ماعادش عندنا تعظيم حقيقى للدار الآخرة!
يا إخواني لو انت ماشي في عربية ضمن طريق اتجاه واحد، شارع اتجاه واحد والمرور ماشي والحركة ماشية والناس مبسوطة، فجأة لقيت عربية ماشية في الاتجاه المعاكس وسدّة الشارع والناس وقفت والمرور وقف، الناس كلها هتبقى مخنوقة أد إيه؟ كل الناس هتبقى مخنوقة من الاتجاه المعاكس أد إيه؟
أهو إنت لما بتعصي ربنا بتكون في الاتجاه المعاكس.. الكون كله اتجاه واحد، إنت لما بتعصي ربنا إنت اللي بتمشي في اتجاه معاكس، الكون كله اتجاه العبادة، اتجاه حب ربنا، اتجاه الإقبال على ربنا، إحنا اللي بمعاصينا يا جماعة الكائن الوحيد في الكون اللي ماشي في الاتجاه المعاكس.
طيب وبعدين؟ وبعدين؟ محتاجين وقفة، محتاجين صفحة جديدة مع ربنا..
لما يكون واحد عنده مشكلة بينه وبين مدير الشغل فيقوم واحد يقول له إنت عايز تصالحه يقوله آه، يقول له أحب يوم إليه وأحسن يوم ممكن تزوره فيه بيبقى فاضي يوم الجمعة مثلاً وأحب هدية بيحبها جدًا الحلويات مثلاً، هات له أحب هدية وروح له في أحب يوم تبدأ معاه صفحة جديدة على طول..
الأيام اللي هنتكلم النهادره عن خطورتها الرهيبة،
عايزين نيجي لربنا في أحب أيام بيحبها بأحب أعمال بيحبها ونقول له صفحــة جديدة يا رب،
هنكتب إيه في الصفحة الجديدة؟
موضوع النهارده أعظم فرصة في حياتك وحياتِك، يا جماعة العشر الأوائل من ذي الحجة فيهم يوم عرفة، النبي عليه الصلاة والسلام بيقول بيكفر ذنوب سنتين، ذنوب سنتين يا رسول الله؟! يعني 12 ساعة صيام.. مش 12 ساعة عبادة يا جماعة، مش عبادة يوم عرفة تكفر ذنوب سنتين، صيام بس، عمل صالح واحد بس في يوم واحد بس يكفر ذنوب سنتين، يعني السنتين دول 24 شهر والصيام 12 ساعة ..12ساعة يكفروا 24 شهر..
يبقى الساعة تكفر أد إيه؟ شهرين، يبقى ال60 دقيقة اللي في الساعة يكفروا 60 يوم في شهرين، يبقى الدقيقة تكفر يوم، يبقى الدقيقة بكام؟ بيوم!
يبقى إحنا داخلين على أيام مش هنحسبها بالساعة ولا بالليلة ولا بالنهار.. هنحسبها بالدقيقة، هنحسبها بالثانية، أعظم فرصة في حياتك.. آخر فرصة..إزاي؟
أحد الشباب - الله يرحمه- كان ماشي بالعربية وماشي بسرعة وبيشد بقى مع زمايله ومشغل الكاسيت على الآخر بسرعة العربية اتقلبت بيه 5 لفات، مات الشاب، اليوم اللي مات فيه ده كان آخر فرصة في حياته..
يعني إيه؟ يعني العشرة دول آخر فرصة، آخر فرصة مش في حياتنا ياجماعة: في السنة ياجماعة، السنة هتخلص، ذو الحجة خلاص آخر السنة. يعني إحنا الوقتي في لجنة الامتحان وورقة الإجابة في إيدينا ومش عارفين نجاوب، والمراقب قام مِنادى في الميكرفون: خدوا بالكم لسه ربع ساعة والمهم الورقة هتتسحب، ربع ساعة! أهوَّ ده النداء اللي جايلنا من ربنا خدوا بالكم: خلاص لسه أيام والسنة هتخلص، الربع ساعة الآخرانية اللي هي ذي الحجة، عشرة ذي الحجة.
احنا الوقتي ياجماعة أيام إمتحانات بالنسبة للطلبة، الطالب اللي قاعد طول السنة غافل بيجي أيامها يِعوض ويِلحق،
ربنا جعلنا المواسم دي عشان نِعوض ونِلحق، يلا قُدامك فرصة تِلحق اللي سَبقَك، يلا قدامِك فرصة تعوضي اللي فاتِك، قدامَك فرصة تجدد شحن قلبَك، قدامَك فرصة إنك تنطلق وتصحح وجهتَك.
لسه الباب متقفلش،
اللي راح عليه رمضان لسه الباب متقفلش،
اللي ما أُعتقتش رقبته من النار في رمضان لسه قدامه فرصه أهو،
اللي متغفرلوش كل ذنوبه في رمضان لسه قُدامه فرصة أهو، اللي ماكسبش ولا باب من أبواب الجنة الثمانية اللي كانت مفتوحة في رمضان لسه الفرصة أهو،
يا جماعة اللي ماثبتش في رمضان لسه الفرصة أهي، اللي وقع بعد رمضان طوق نجاة أهو،
العشرة الأوائل من ذي الحجة طوق نجاة جاي بيه الليلة بإذن الله
عشان يبقى في كهربة إيمانية في قلبنا تخلينا مانمش العشر أيام دول.
أفضل أيام الله، أفضل أيام الدنيا، أعظم أيام الله في الدنيا وفي التاريخ كلها هي اللي أنا جاي أكلمكم عنها الوقتي يا جماعة وجاي أكلمكم عنها الليلة، خدوا بالكم دي أحب الأيام إلى الله زي ما هنقول الوقتي، مش هيعبده فيها غير أحب العباد إلى الله، دي أحب الأيام إلى الله يبقى مش هيعبده فيها غير أكتر ناس بتحب الله، دي أحب الأيام إلى الله يبقى مش هيعبده فيها غير أكتر ناس ربنا مختارهم ومصطفيهم، مش كل الناس منتبهة للأيام دي.
الدنيا أخرتها إيه؟ لو معاك ميت مليار هتسكن في ألف شقة؟! هي شقة
إنت جسمك له احتياجات كل يوم زي النوم،
له احتياجات كل ساعة أو كل كذا ساعة زي الأكل والشرب، له احتياجات كل ثانية زي النَفَسْ،
كذلك روحك لها احتياجات كل يوم زي إنك تقرأ القرآن مرة، ليها احتياجات كل كذا ساعة زي إنك تصلي في الجامع جماعة، ليها احتياجات كل ثانية زي ذكر الله،
أعظم أيام ذكر الله هي الأيام دي اللي أنا جاي أكلمكم عنها.
إمتى بقى؟" أَلَمْ يَأْنِ لِلَّذِينَ آمَنُوا .. "الحديد : 16 لسه ماجاش الوقت؟! إمتى؟
إمتى هم الدنيا اللي مِكبلِك عن الإنطلاق في العبادة هتحررِي منه؟
أيام لا تُعوض في تجديد الشحن: ياللي خرجت من رمضان ووقعت،
ياللي لسة فيه معاصي مش قادرين إنكم تسبوها، ياللي لسه متردد متذبذب
أيام لا تعوض ( فضل العشر ذي الحجة ) - د حازم شومان
way2allah.com/k...
ورق صفحة جديدة مع الله
www.way2allah.c...
زورونا على الصفحة الرسمية لشبكة الطريق الى الله الرسمية
/ way2allahpage