يعني إيه صفر معماري !؟؟

يعني إيه صفر معماري .. ؟؟
الصفر المعماري هو منسوب أو مستوي يقدر أقيس منه أي حاجه فى المبني ناحية الإرتفاع
فلو عايز أعرف أرتفاع بلاطة الدور الأول مثلا .. هنسبها للصفر المعماري
اللى هو منسوب الرصيف
فلو مثلا عرفت إن إرتفاع بلاطة الدور الأول 3.80 متر
يبقي بعيدة 3.80 عن منسوب الرصيف اللى هو الصفر المعماري
طيب لو منسوب الحفر بتاعك مكتوب فى تقرير التربة - 1,20 متر
يبقى هتحفر لغاية 1,20 متر من منسوب الرصيف بتاعك
طيب الصفر المعماري ده أو منسوب الرصيف المفروض بنحدده إزاي ؟؟
بنحددة عن طريق وحدة بنسميها الـ Z
وبترمز لإرتفاع النقطة عن منسوب سطح البحر فى إسكندرية بالنسبة لمصر
فلو عرفت ان الصفر المعماري بتاعك مثلا على إرتفاع 233 متر
يبقى النقطة ده فوق سطح بحر إسكندرية ب 233 متر
ولكل مبني صفر معماري منسوبه مختلف عن المبني التاني بالنسبة لبحر إسكندرية
حسب بقى منطقتك وحسب المحافظة بتاعتك
والفرق بينه وبين الروبير .. ان الروبير نقطة معلومية الإحداثيات فى أتجاه الـ ( x , y , z )
أم الصفر المعماري هو منسوب أو مستوي أقدر أنسب منه إرتفاعات وليس نقط عكس الروبير
فلو مثلا عايز تعرف المكان اللى هتحفر فيه عشان تعمل قواعد المبني بتاعك
فهتحدد الحدود من الروبير
طيب عايز تعرف هتنزل أو هتحفر لغاية فين ..
هتعرفه من الصفر المعماري وبنسميه منسوب الحفر
طيب هل من المعقولة عشان احدد الصفر المعماري أروح إسكندرية وأنقل المنسوب من هناك
أكيد بتهزر ؟؟
الرصيف فى العادي بيكون أرتفاعه 20 سم عن الطريق أو الأسفلت
فاطلع عن الأسفلت بتاعي 20 سم وشكرا على كدة
ولو مفيش طريق أطلع 20 سم من وش المطبق الرئيس أو البلاعه اللى فى الشارع
لان منسوبها بيكون هو منسوب الطريق
انا محمود مختار وده كان فيديو انهاردة .. سلاام
#الأعمال_المساحية #الروبير #مساحه #رفع_مساحي #مهندس_مساحة #محمود_مختار #mahmoud_mokhtar