Рет қаралды 20,535
2. Кімде-кім таухидті тахқиқ қылса,жәннатқа есеп-қисапсыз кіреді.
Алла Тағала сөзінде: {Расында Ибраһим Аллаға бойұсынушы, тура
жолдан таймаған бір жолбасшы - имам болды және ол мушриктерден
емес еді} (Нахл, 120).
Алла Тағала сөзінде: {Олар Раббыларына серік қоспайды}
(Му`минун, 59).
Хусайн ибн Абдурахманнан (р.а.), ол былай деді: «Мен Сағид ибн
Жубейрмен (р.а.) бірге болғанымда, ол: «Сендердің қайсыбірің кеше түнде
ағып бара жатқан жұлдызды көрді?», - деді. Мен: «Мен көрдім», - дедім.
Одан кейін мен: «Мен сол уақытта намазда болған жоқпын, бірақ мені бір
нәрсе шағып алған еді», - дедім. Ол: «Сен оған қарсы не істедің?» - деп
сұрады. Мен: «Дем салдырдым», - дедім. Ол: «Оған сені не итермеледі?» -
деді. Мен: «Бұны істеуге итермелеген пайғамбарымыздың ﷺ Шағби
жеткізген хадисі», - дедім. Ол: «Ол сендерге не деп айтқан еді?» - деді.
Мен: «Ол Бурайда ибн Хусайбтан бізге риуаят етіп, былай деді: «Дем салу
тек көз тию мен шаққанға ғана қарсы болады», - дедім. Сағид:
«Естігенде тиылған адам нендей жақсы амал істеді!» - деді. Бірақ Ибн
Аббас пайғамбарымыздан ﷺ риуаят етіп, былай деді: «Маған үмметтер
көрсетілді. Сонда мен қасында бір топ адамдар бар пайғамбарды
көрдім. Тағы да қасында бір, не екі адам бар пайғамбарды көрдім, және
қасында ешбір адам жоқ пайғамбарды көрдім. Кенеттен менің
алдымнан қара құрым топ көрінді. Мен оларды өзімнің қауымым деп
ойладым, бірақ маған: «Бұл Муса және оның қауымы», - делінді. Содан
кейін қарап едім, алдымнан қара құрым топ көрінді. Сонда маған: «Бұл
сенің қауымың және олардың қасында есепке тартылмай, азап шекпей
жәннатқа кіретін жетпіс мың адам бар», - делінді». Содан кейін
пайғамбар ﷺ тұрды да үйіне кіріп кетті. Ал жұрт болса солар (жетпіс
мың) жайлы талдауға кірісіп кетті. Кейбіреулері: «Мүмкін бұлар Алла
елшісінің ﷺ сахабалары шығар», - деді. Тағы біреулері: «Мүмкін бұлар
Исламда туылып, Аллаға еш нәрсені серік қоспағандар шығар», - деді.
Тағы да басқа нәрселерді айтты. Алла елшісі ﷺ үйінен шыққан кезде, оған
ﷺ (араларында болған дау-дамай туралы) айтып берді. Сонда пайғамбар
ﷺ : «Олар дем салдыруды сұрамайды, күйдірумен емделмейді, еш нәрсені
ырымға жорымайды және Раббыларына тәуекел етеді», - деп айтты.
Сонда Укка́ша ибн Ми́хсан тұрып: «Иә, Алланың елшісі! Алла мені
солардан қылсын деп дұға етші», - деді. Пайғамбар: «Сен солардансың»,
- деді. Содан кейін тағы бір кісі тұрып: «Алла мені солардан қылсын деп
дұға етші», - деді. Пайғамбар: «Ол жағынан сенен Укка́ша озды», - деді».