Þyrlusveit Landhelgisgæslunnar sækir sjúkling langt á haf út

Þyrlusveit Landhelgisgæslunnar fór í langt sjúkraflug á haf út síðdegis í gær vegna bráðra veikinda um borð í skemmtiferðaskipi. Áhöfnin á TF-GRO var kölluð út á fimmta tímanum vegna veikindanna sem voru um borði í farþegaskipinu Ambience sem statt var um 160 sjómílur út af Garðskaga.
Þegar þyrlan nálgaðist skipið var skipstjóra þess gefnar leiðbeiningar um stjórntök og hraða vegna hífingarinnar frá skipinu. Skipið var beðið um að beygja upp í vind og hægja ferðina niður í sex hnúta ferð.
Sigmaður og læknir þyrlunnar fór um borð í skipið við bakborðshorn þess eftir að tengilínu var slakað niður. Þegar um borð var komið var hugað að sjúklingnum og hann undirbúinn fyrir hífingu um borð í þyrluna.
Þegar búið var að búa um sjúklinginn var tekið á móti króknum, læknirinn hélt fyrstur upp og því næst var sjúklingurinn hífður upp í börunum. Sigmaður þyrlunnar fór síðastur upp með farangur sjúklingsins.
Að hífingum loknum var áhöfn skipsins þakkað fyrir samstarfið og haldið til Reykjavíkur. Skipstjóri skemmtiferðaskipsins hafði sérstaklega orð á hve hratt verkefnið gekk fyrir sig og þakkaði þyrlusveit Landhelgisgæslunnar innilega fyrir snör viðbrögð.
Meðfylgjandi myndband sýnir hvernig verkefnið gekk fyrir sig í gær.

[@SheldonT.]

Great job! That was awesome.

[@bovarfririksson2449]

Gaman að fá að sjá ykkur í verki! Það væri líka fróðlegt að sjá æfingu með björgunarsveit þ.e.a.s. hvað þið/þau gerið þegar þyrlan kemur að/lendir, hvað ræður hvort er híft eða lent, rétt verklag þegar komið er að/farið frá þyrlunni. Það er svo margt varðandi þyrlunar sem fólk veit ekkert um, og væri örugglega ágætis sjónvarpsefni 😊 Ég mundi allavega horfa það.