Ысырапкорчулук кудука алып баруучу жол/ Султанали ажы Гапуров

Аллах Таала куранда айтат: “Жегиле, ичкиле бирок ысырап кылбагыла!” Ысырапкерчилик дегенде алгач жеген, ичкен, колдонгон нерселерди түшөбүз. Айрым адамдар убакытты, өмүрдү, дагы кээ бирөөлөр болсо башка нерсени ойлошот. Туура ошондой. Бирок ысырапкерчилик деген сөз ушулар менен эле чектелип калбайт. Анын мааниси терең. Аятта ысырап кылбагыла деген сөз да бир эле биз ойлогон маани менен чектелбейт, көптөгөн маанилери бар. Ысырапкерчилик сөзүн дагы жөнөкөйлөтүп айтканда, бул төгүн чачындык. Туура эмес пайдалангандык. Сарамжалсыздык. Чегинен ашыкча колдонгондук. Мурдагы доорго карасак, адам баласы көп деле нерсеге муктаж болгон эмес. Болгону үч-төрт гана нерсеге муктаж болчу. Алар - тамак-аш, кийим-кече, турак-жай жана унаа. Мына ушулар адамзаттын чыныгы зарыл муктаждыктары болуп саналчу. Адамдардын ондон бири анча мынча зарыгып жашабаса, баары эле бирдей жашачу. Азырчы? Азыр болсо бул үч-төрт муктаждыктын саны жүзгө, айтор миңге көбөйдү. Мурдагыга караганда ондон бири эмес, жүздө сексен пайызы муктаж бойдон калууда. Мунун себеби эмнеде деп ойлойсуздар?!