Зікіра Қожаевты зейнеткерлік жасына шығарып салу құрметіне арналған кеш

2021 жылдың 26 қазан күні Ғ.Мұратбаев атындағы Жетісай гуманитарлық-техникалық колледжінде елімізге танымал ақын, оқу орнымыздың ұлағатты ұстазы Зікіра Қожаевты зейнеткерлік жасына шығарып салу құрметіне арналған кеш болып өтті.
Кеш екі бөлімнен тұрды. Алғашқы бөлімде ұлағатты ұстазға деген құрметтер көрсетіліп, қызмет еткен жылдарынан бейнематериалдар көрсетілді, шәкірттер ұстаз шығармашылығынан өлеңдер оқыды. Колледж ұжымы оқу орнының биіктен көрінуіне өлшеусіз үлес қосқан ардақты ұстазының кездесуіне «Ұстаз мерейі» медалін тағып, иығына зерлі шапан жауып, мерекелік адресатты табыстады.
Ақын З.Қожаевтың отты жырлары мен өлеңіне жазылған әндермен айшықталған екінші бөлімде жергілікті және Нұрсұлтан, Алматы, Шымкент, Ақтаудан келген ақын жазушылар ақжарма тілектерін айтты. Құттықтау сөз алған ақындар М.Құралов, М.Ерімбетов, Б.Құдияров, А.Төребеков, П.Есенбеков, Т.Ақылбаев, М.Тұрдықұловтар ақын З.Қожаевтың қазақ әдебиетіне қосқан үлесін атап өтіп, поэзиясының ерекшелігіне тоқталды. Ағайындар атынан сөз алған мемлекеттік қызмет саласының ардагерлері А.Мединаев пен Ә.Исаевтар асыл азаматтың ұстаздық және ақындық еңбегіне жоғары баға беріп, сый -құрметтерін жасады. Кештің көркін Зікіра Қарасайұлының әніне жазылған әндерді орындап жүрген танымал әншілер Жұбаныш Жексенұлы, Айжан Тәженова, Абылай Оспанов, Мырзахан Махановтар сахнаға шыққаны аша түсті. Олардың орындауындағы ақын сөзіне жазылған әндер З.Қожаевтың ақындық тұлғасының қазақ әдебиетінде биік, өнер жұлдыздары арасында абыройының жоғары екеніне көз жеткізе түсті. Ақын өлеңіне ән жазған Мұхит Қасқырбаев, Мұхан Байбосынов, Арайлым Саттарова сынды танымал сазгерлер кеш қонағы ретінде қатысты. Қарақалпақстаннан арнайы келген ақынның досы, жыр кейіпкері Оразәлі Ерекеновтың құттықтауы жастық шаққа сапар шектірді. Кеш соңында ұстаз-ақын З.Қожаевпен ұстаздар мен студент жастар бірге естелікке суретке түсіп, алдағы жылдарына сәттілік тіледі.