ازاي مصر تكسب من بيع قناة السويس وهل هذا سيتم الان

كتر الكلام الفترة اللي فاتت عن بيع قناة السويس.. أو بعنى أدق بيع إيرادات القناة.. القناة اللي بتجيبلنا من 7 لـ9 مليار دولار في السنة، القناة اللي اتحفرت بدم المصريين، القناة اللي كانت سبب في العدوان الثلاثي على مصر لما أعلن الرئيس جمال عبد الناصر تأميمها، القناة اللي بتعتبر معلم من معالم مصر زي الأهرامات كدا.. تفتكر ليه كل شوية يطلع كلام عن بيع القناة أو بيع الإيرادات اللي بتجيبها، وأزاي أصلا أبيع الإيرادات اللي بتجيبها قناة السويس.. ومين اللي هيشتري؟..
وهل دي حاجة عادية ولا لأ؟..وهل الدولة قالت أصلا حاجة زي كدا ولا مقالتش؟، مهي لو هتبيع يبقى هتعرضها للبيع زي الشركات الحكومية اللي في برنامج الطروحات؟.. وبدال مقالتش.. الناس بتجيب الكلام بتاع بيع قناة السويس منين؟.. وهل هتبيع فعلا ولا لأ؟..
حلقتنا انهاردة حلقة أمن قومي، ومعلومات دقيقة للغاية هتكشفلك الحقيقة قدام عينك، بس خليك معانا للآخر عشان الموضوع مش صغير ومش سهل ومحتاج تركيز شديد..
(وثيقة من مجلس الوزراء.. تثير قلق المصريين)
في يوم 5 يناير 2024.. مركز المعلومات ودعم اتخاذ القرار التابع لمجلس الوزراء طلع وثيقة مهمة للغاية.. بعنوان «أبرز التوجهات الاستراتيجية للاقتصاد المصرى للفترة الرئاسية الجديدة (2024ــ2030)».
الوثيقة دي المفروض إن فيها الخطة الاقتصادية بتاعة الدولة من أول 2024 لحد 2030، موجود فيها الحكومة هتعمل أيه في الملف الاقتصادي خلال الفترة دي، ومن المفروض إن الوثيقة دي هتتعرض على حوار مجتمعي ويبتدوا يناقشوها ويشوفوا أيه اللي هينفع وايه اللي ماينفعش..
وعشان ندخل في الموضوع علطول ومنطولش عليكوا.. الوثيقة دي كان مكتوب فيها "باند" كدا بيقول إن الدولة بتدرس عمل «توريق» لـ25% من الإيرادات الدولارية لمصر...
هنا بقى محتاجك تركز معايا جدا جدا.. الحكومة بتقولك إنها هتعمل توريق لربع العائدات الدولارية لمصر وهتقوم بعد كدا طارحة سندات مقابل هذا العائد الدولاري وتبيعه لبنوك الاستثمار أو مستثمرين أجانب أو ايا كان، وبتقولك كمان إن بالحركة دي الحكومة بتستهدف تلم 10 مليار دولار.
أيه بقى الكلام الغريب دا، وايه علاقته بقناة السويس أصلا.. أنا أقولك..
الأول يعني أيه كلمة «توريق».. للعائدات الدولارية اللي ذكرتها الوثيقة
هديك مثال بسيط جدا.. انت عندك محل بتأجره بالدولار.. بيجيبلك 1000 دولار كل شهر.. يعني 12 ألف دولار في السنة.. جيت اتزنقت في مبلغ ومش عارف تتصرف..فبتروح رايح لجهة ممولة بتقولها والله انا عندي محل بيجيبلي 12 ألف دولار في السنة.. اديني 10 آلاف دولار دلوقتي.. وانت ابقى خد إيجار المحل طول السنة دي.. يعني انا كدا بدلت فلوس هتجيلي مستقبلا بفلوس هاخدها دلوقتي حالا وهدفع عليهم فايدة.. اللي هما الـ2000 دولار الفرق دول.. دا كدا اسمه «توريق»، بدلت فلوس هتجيلي على آجال مستقبلية بفلوس هاخدها فأيدي دلوقتي حالا حتى لو هخسر منهم جزء مش مشكلة المهم أفك زنقتي دلوقتي..
الوثيقة بقا بتقولك إنها هتعمل توريق للعائدات الدولارية بتاعة الدولة.. هنا لازم نبص على أيه اللي موجود في الدولة بيجيبلنا عائد دولاري..
عندك 4 مصادر أساسية..
أولهم تحويلات العاملين بالخارج..ودي كانت بتعدي الـ31 مليار دولار، ولكن بعد أزمة العملة وانتعاش السوق السودا مبقتش تعدي الـ22 مليار دولار.. ولكن دا مش موضوعنا.. موضوعنا أزاي هيتعملها توريق.. أزاي الحكومة هتاخد الفلوس دي مقدما من أي جهة تمويل وهي مبتملكهاش أصلا.. فهي في الأول وفي لآخر فلوس أفراد.. ممكن يحولوها وممكن لأ.. فدا أول مصدر مش هينفع يتعمله توريق..
المصدر التاني وهو السياحة.. بالظبط زي حوالات المصريين بالخارج.. فلوس السياحة ملكا لشركات السياحة والفنادق.. يبقى مش هتنفع للتوريق.
والصادرات المصرية شرحهم بالظبط.. فلوس ملكا للمصدرين، كدا مقدمناش غير قناة السويس هي اللي فلوسها ملكا للدولة، يعني هي المصدر الوحيد اللي ينفع يتعمله توريق..
يعني أنا اقدر اروح لأي جهة تمويل، ولو يكن مثلا البنك الدولي.. هديله سندات بضمان إيرادات قناة السويس وآخد منه مبلغ معين، وهو بالسندات دي يقدر ياخد إيرادات قناة السويس..
طب أيه المشكلة هنا بدال هحل أزمة عندي.. وكدا كدا بعد مافهمنا فالكلام مش على بيع قناة السويس، لأ دا بيع إيراداتها بس.. فأيه المانع؟!
نيجي هنا بقى نسأل سؤال.. هل دا الحل الأمثل بالنسبة للحكومة؟ وهل الحكومة مضطرة إنها تعمل الخطوة دي.. خليك معانا..
مفيش حد يخفى عليه دلوقتي الأزمة الاقتصادية اللي بتمر بيها مصر.. والسبب الرئيسي في دا هو نقص العملة الأجنبية.. وفي نفس الوقت الدين الخارجي وصل لـ165 مليار دولار.. منهم أكتر من 40 مليار دولار المفروض يدفعوا في 2024.. وهنا السؤال.. هنجيبهم منين؟!..
الدولة المصرية بتحاول من كل الاتجهات إنها تقدر تزود مصادر الدولارات بتاعتها عشان تقدر توفي التزاماتها.. وفي الظروف اللي زي دي، بنضطر إن احنا نستلف تاني عشان نسدد ديون قديمة.. ودا مش كلام سر ولا حاجة.. دا كلام قاله الدكتور محمد محيط، وزير المالية بنفسه قبل كدا.. ولكن بكل أسف حتى الاستلاف عندنا بقى فيه مشكلة كبيرة..
#ولي_العهد_السعودي
#بايدن
#السعودية
#السيسي #الجيش_المصري #اخبار_مصر#أمريكا #السعودية #الإمارات #قطر #روسيا #روسيا_اوكرانيا #الكويت #البحرين #الرئيس_السيسي #سامري #اخر_الاخبار #الجزيرة #العربية #سكاي_نيوز_عربية #اخبار_عربية #اخبار_العالم #اخبار_اليوم #المملكة_العربية_السعودية #الخليج #سوريا #فلسطين #إثيوبيا #سد_النهضة #مصر #الاقتصاد #المغرب #الجزائر #العراق #الأردن #تركيا #القاهرة #الرياض #أبوظبي #أخبار #الصين #الرياض #لبنان #ليبيا