Zamira Suyunova kuylaydi. Qo'shiqlar guldastasi

Замира Суюнова куйлайди. Қўшиқлар гулдастаси / Zamira Suyunova kuylaydi. Qo‘shiqlar guldastasi.
Zamira Rajabovna Suyunova (1958-yil 27-iyunda tugʻilgan) - Oʻzbekiston xalq artisti (1999). Dutorchi qizlar ansamblida xonanda (1979-yildan), musiqa rahbari (1984-yildan) va badiiy rahbar (1995-2002). Oʻzbekiston davlat konservatoriyasida oʻqituvchi, dotsent (2004-yildan).
Zamira Suyunova 1958-yil 27-iyunda Qashqadaryo viloyati Kitob tumanidagi Shatri qishlogʻida oʻqituvchi Rajab Suyunov xonadonida tugʻilgan. Oʻn bir farzandning beshinchisi.
Toshkent konservatoriyasini xor dirijyorligi ixtisosligi boʻyicha tugatgan (1981). Oʻzbek ashulachilik sanʼati sirlarini Gʻ. Toshmatov, K. Ismoilova, A. Ismoilovlardan oʻrgangan.
Jarangdor, butun diapazonida tiniq ovozga ega boʻlib, maqom yoʻllari („Dugoh Husayn“, „Savti Chorgoh“, „Saraxbori Dugoh taronasi“ va boshqalar), xalq ashula, yalla va laparlari („Yoʻl boʻlsin“, „Yoryor“ va boshqalar), ayniqsa, bastakorlar asarlari (Gʻ.Toshmatovning „Baxtimdan“, A. Ismoilovning „Oybuloq“, „Bilmam, adashdimmi“, „Alla“, „Ayol qalbi“ va boshqalar)ni nozik did bilan va badiiy taʼsirchan talqin etgan. Bastakor sifatida bir qator („Vatan ishqi“, „Alla“, „Gul ochilsa“, „Ona boʻlib“ va boshqalar) qoʻshiq va ashulalar yaratgan. Ijrolari Oʻzbekiston radiosi fonojamgʻarmasiga, bir necha grammplastinka, audiokassetalarga yozilgan. Uning hayoti va ijodiga bagʻishlangan telefilm va videofilmlar suratga olingan. Angliya, Fransiya, Ispaniya va Germaniyada gastrollarda boʻlgan.
Замира Ражабовна Суюнова (1958-йил 27-июнда туғилган) - Ўзбекистон халқ артисти (1999). Дуторчи қизлар ансамблида хонанда (1979-йилдан), мусиқа раҳбари (1984-йилдан) ва бадиий раҳбар (1995-2002). Ўзбекистон давлат консерваториясида ўқитувчи, доцент (2004-йилдан).
Замира Суюнова 1958-йил 27-июнда Қашқадарё вилояти Китоб туманидаги Шатри қишлоғида ўқитувчи Ражаб Суюнов хонадонида туғилган. Ўн бир фарзанднинг бешинчиси.
Тошкент консерваториясини хор дирижёрлиги ихтисослиги бўйича тугатган (1981). Ўзбек ашулачилик санъати сирларини Ғ. Тошматов, К. Исмоилова, А. Исмоиловлардан ўрганган.
Жарангдор, бутун диапазонида тиниқ овозга эга бўлиб, мақом йўллари („Дугоҳ Ҳусайн“, „Савти Чоргоҳ“, „Сарахбори Дугоҳ таронаси“ ва бошқалар), халқ ашула, ялла ва лапарлари („Йўл бўлсин“, „Ёрёр“ ва бошқалар), айниқса, бастакорлар асарлари (Ғ.Тошматовнинг „Бахтимдан“, А. Исмоиловнинг „Ойбулоқ“, „Билмам, адашдимми“, „Алла“, „Аёл қалби“ ва бошқалар)ни нозик дид билан ва бадиий таъсирчан талқин этган. Бастакор сифатида бир қатор („Ватан ишқи“, „Алла“, „Гул очилса“, „Она бўлиб“ ва бошқалар) қўшиқ ва ашулалар яратган. Ижролари Ўзбекистон радиоси фоножамғармасига, бир неча граммпластинка, аудиокассеталарга ёзилган. Унинг ҳаёти ва ижодига бағишланган телефильм ва видеофильмлар суратга олинган. Англия, Франция, Испания ва Германияда гастролларда бўлган.