Рет қаралды 175
Ассаламу әлейкум!
Жұма қабыл болсын.
Бізге жақын адамдар болады. Қасымызда жүрген жандар бар Күнделікті күйбіңнен олардың жақындығын сезіне бермейміз.
Бірақ солар дүниеден өтсе бар күшімізді салып онымен қоштасуға асығамыз. Қиыны онымен емес оның санамыздағы елесімен сөйлесіп, соны сағынып, қамығамыз.
Өксікке тұншығып, көзі тірісінде неге кездеспедім, неге қауқылдасып, сөйлеспедім. Кем дегенде қоңырау шалып сөйлеспедім ғой - деп қатты өкінеміз.
Мен ағама қайық сыйлағым келген.
Уақыты келсін деп келешекке қалдырдым. Аңшылық дүкендерге көзім түсіп, сыртындағы қайықтарды оймен сатып алып, апырып беріп жаттым. Оның қуанғанын көріп, қызығатынмын.
Астанадамын. Түнде қоңырау шалып ағамның дүниеден өткенін естіртті. Селсоқ болып қалдым. Ішім алай-дүлей. Өртеніп барады.
Көз алдымнан ағаммен өтпей қалған кездесулер, әзілдесу, шүйіркелесулер, қайықты апарып беріп қуантқан сәттер бұлдырап ағып жатты. Сағыныш тұншығып ішімнің астан кестеңін шығарды.
Ол енді менің қызықтарымды көре алмайды. Мен онымен кездесе алмаймын. Рахаттанып отырып, жеңгемді әзілмен шымшылап отырып бірге шәй іше алмаймыз.
Досым ше...
Ылғи Астанаға барғанда кездесіп бейқам отырып өткен күнді еске түсірсек қой деп жүретінмін. Күнделікті жұмыстармен естен шығып, қоңырауда шалмайтынмын. Ол да. Мен де.
Кітапты көп оқитын. Соларды талқылап қызу айтысатынбыз.
Оның да өмірден өткенін естіртті...
Осылай жүріп бәрі өтіп жатыр...
Ертеңге қалдырма. Қазір хабарлас анаңа, әкеңе, бауырыңа, ағайынға, досыңа...
Елесі алыстаса да жүрегіңді жылытатын адамдарға кем дегенде қоңырау шалып жаныңа жақын тұт.
Сыйлық жасағың келсе ертеңге қалдырмашы.
Қазір істе. Барынша дереу сыйла...
Бірімізді біріміз сағынамыз...
Кездесуге кедергі жоқ.
Ол өлгенін күтпе. Қазір қоңырау шал.
Қазір бар. Кездес!