Zenaatlar dünyası. Muarrir - Mayye Safet. Dilâra Abibullanıñ sesinen.

Zenaatlar dünyası.
Muarrir - Mayye Safet.
Dilâra Abibullanıñ sesinen.
Kâinatçı
Kâinatçı azır yolğa,
Kâinatqa uçmağa.
Vızlı raketanı ayday,
Yıldızlarğa selâm yollay.
Oca
Ocapçe her şey bile,
Esap, tabiat, elifbe.
Hepisini sevinip,
Balalarğa ögrete.
Ressam
Ressam - istidatlı adam,
Çeşit resim yapa ressam.
Resim üslüpleri pek çoq,
Tasvirlerniñ soñu hiç yoq.
Ekim
Ekimni her kes bile,
Ekimni her kes seve!
Merametli bu insan,
Her bir hastalıqnı yeñe.
Alim
Alim - aqıllı insan,
Bilgi yolunı açqan.
Progress alimniñ elinde.
O, ilimni ilerilete.
Politsiya hadimi
Politsiya hadimi -
Tertip-nizam qoruyıcı.
Qanunlarnı eda etmek -
Sakinlerniñ boyun-borcu.
Fotograf
Bayram olsa, olsa bir toy,
Şeher olsun, olsun bir köy.
Fotograf kelecek, ebet,
Sizge yapar dülber süret.
İş adamı (Biznesmen)
İş adamı - ciddiy insan,
Başta tize o biznes-plan.
Her şey uysın dep, tırışa,
Kârlı olsun dep, çalışa.
Çalğıcı
Çalğıcı bahtlı bala,
Her nağmelerni çala.
Göñül kötere pek tez.
Haytarmağa tüşe her kes.
Aşçı
Aşçı şorba pişirgen,
Şorba pek lezetli eken.
Et, havuç, qartop, soğan,
Aşap toy ve ol sağlam!
Boksçı
Boksçı ring ortasına tüşti,
Raqibinen yumruqlaştı.
Seyirciler quvandı.
Boksçı bu yarışta yeñdi.