Рет қаралды 53,401
Byna drie dekades nadat Orkney snork nie duisende Afrikaanse huishoudings vasgenael voor die televisie gehad het, vind mense steeds aanklank by dié vermaaklike sitkom. Teatergangers was onlangs in vervoering tydens ’n reünie van die akteurs wat AfriForumTV by die AfriForum Teater in Pretoria aangebied het. Dit het duidelik baie herinneringe by hulle wakker gemaak en ná afloop van die gesprek het hulle oor hul voete geval om hul gunstelingkarakters te ontmoet en selfies saam met hulle te neem. Willie Esterhuizen, skepper van die reeks, meen mense vind steeds aanklank by die reeks omdat dit “die storie van goeie, doodgewone mense is”. Mense kan identifiseer met die wel en weë van ’n Yolanda (Sally Campher), Ouboet (Frank Opperman), Hendrik (wyle Zach du Plessis) en Maggie (Annette Engelbrecht), ’n gewone gesin van Orkney. As na die immer gewildheid van dié komedie gekyk word, is dit eintlik ironies dat dit 11 jaar geneem het vandat Esterhuizen die eerste episode geskryf het totdat die reeks deur die SAUK uitgesaai is. Die opname van die reünie sal in Oktober op AfriForumTV uitgesaai word. Die publiek kan ook uitsien na die episodes van Orkney snork nie wat op die platform beskikbaar sal wees.