'Aizkora-apustu bikaina!' (Arria V.a-Iker Vicente) (Tolosa, 2018-04-08) (14'23'')

Aizkolari handi baten aurrean gaudela erakutsi du Iker Vicente gazteak berriro ere. Hiru minutu eta 9 segundoko aldea atera dio Xabier Orbegozo 'Arria V.a' aurkariari.
Neketsua eta mardula izan da bi aizkolariek egin behar izan duten lana. 'Arria V.a'-k plazaratutako egurrak ipurdi aldekoak izanik, apustu gogor baten atarian jarri du zalearen interesa. Apustua finkatu zen egunean geratu bezala, 'Arria V.a'-k kanaerdikoak eta Vicentek 60 ontzakoak plazaratu zituzten atzo. Hamabietan eman zaio hasiera apustuari. Indartsu ekin diote biek ala biek. Enborrak mozteko hurrenkera ere ezberdina izan da. 'Arria V.a'-k, lehenik kanaerdikoak eta 60 ontzakoak ondoren moztu ditu. Bigarren itzulian ere berdin jokatu du. Vicente gazteak, berriz, alderantziz egin du lehen itzulian: lehenbizi 60 ontzakoak eta gero, kanaerdikoak. Bigarren itzulian, ordea, lehenik bi 60koak moztu ditu; ondoren, kanaerdikoak; eta amaitzeko, beste bi 60koak. Aurretik nor zihoan jakitea ez da samurra izan, baina lan erdietan minutu eta 44 segundo atera dizkio otsagabiarrak errezildarrari. Bere abantaila handitzen joan da eta gaurko apustua berarentzat izan da. 'Arria V.a'-k ere lan bikaina egin du. Vicente “oso ondo” aritu dela eta egun, bera baino “gehiago” izan dela adierazi du. Apustuak ikusmin handia sortu du eta jendez gainezka bete da Tolosako zezen-plaza.