Рет қаралды 43,662
Faarax Raage Waasuge, oo dhawaan u warramay "Hanoolaato", waxa uu sheegay in uu yahay qofka keliya ee ka badbaaday 21 nin oo ay dil ku fuliyeen ciidan ka tirsanaa SNM, isla markaa na uu amarka lagu laayey uu bixiyey guddoomiyihii maxkamaddii SNM, Cabdixakiin Summini.
Dilka oo Faarax sheegay in uu dhacay Julay 8, 1988, ka na dhacay deegaanka Jameecaadka Caynaanshe, oo Burco in cabbaar ah u jira, ayaa nimanka dilka lagu fuliyey, waxa markii hore soo fasaxay oo warqad u soo qoray, saraakiishii ciidankii SNM ee Burco qabsaday: Maxamed Kaahin (Wasiirka A. Gudaha JSL) iyo Alle ha u naxariistee Maxamed Cali.
Waxa uu sheegay in nin haystay Maanyare u diiday in ay gudbaan isku na dayey in uu dhib u geysto, hase yeeshee dadkii deegaanku u diideen in uu wax u geysto, kula na taliyeen in uu Burco ku celiyo. Markii ay soo noqdeen ee ay marayeen Jameecaadka Caynaanshe, in ay halkaa ku kulmeen guddoomiyihii maxkamaddii SNM, Cabdixakiin Summini. Markii loo sheegay in ay yihiin dad Burco laga soo fasaxay, oo la diiday in ay dhaafaan Maanyare la na guddoonsaday in Burco lagu celiyo. Faarax, waxa uu sheegay in Cabdixakiin halkii ku go'aamiyey la laalayo 21kii nin ee uu ka midka ahaa. Isaga oo intaa raaciyey, arrimaha uu u cuskaday layntooda in ay qayb ka ahayd in ay ahaayeen saraakiil ciidamadiid dawladda ka tirsanayd oo tallaabaysay.
Markii dilkii la fuliyey, isaga ayaa dhaawac ahaan looga tegay oo badbaaday. Markii dadkii ku soo yaaceen ee la qaaday ee tuuladii (Jameecaadka) la geeyey, ayaa maalintii xigtay waxa halkaa ugu tegay nin uu ku sheegay, Cabdirisaaq, oo ah ninkii badbaadiyey oo uu abaal weyn u hayo, oo dadkii ku ballamiyey; qoray na warqad ah in aan la taaban karin ee ay xannaaneeyaan, inta uu kala wareegayo. Muddo yar ka dib, waxa uu maqlay in Cabdirisaaq lagu dilay dagaal Oodweyne ka dhacay, isla markaa na uu si xun uga naxay.
Hadda ba, Cabdirisaaqii badbaadiyey ee uu u haystay in dagaalkii lagu dilay, ayaanu soo helnay, waxa aanu la yeelanay na wareysigan ee ka bogasho wanaagsan.