CCIX ƩMER D CCIX UƩESTA : Izlan n lemɛani (Igelmimen, ktuber 1951)

Izlan n lemɛani nna imyanna CCIX ƩMER d CCIX UƩESTA g Igelmimen g wayyur n ktuber n useggas n1951.
Inna-as Ccix Uɛesta i Ccix Σmer g tɣuni tamezwarut :
Reẓmat-i snat ijemjajay Rebbi,
Ku yat d amud nna da ttɣella ?
Irẓem-as-tt Ccix Σmer, inna-as :
Tebnid, a Ljent, i ssaɛidin kullu !
Iga-d diɣ Rebbi leɛdab i imeɛṣan !
Iqqen-as Ccix Σmer tinnes, inna-as :
Qqenɣ-ak uccen iṭṭarr amuggu n wulli,
Ad asin taddaɣ nnag ill’ muḥul ?
Irẓem-as-tt Ccix Uɛesta, inna-as :
Nka i iɣʷemdan imi g-gat tḥanut,
A wa, tiɣʷmest ittergigin, kksen-i-tt !
Iqqen-as diɣ Ccix Uɛesta i Ccix Σmer, inna-as :
Qqenɣ-ak-nn luliyt bubbant ccan,
Leḥkam ur tebḍi, ur yad infara ?
Irẓem-as-tt Ccix Σmer, inna-as :
A wa, naḍreɣ tisent ig ur telli,
Da aɣ-ittɛekkaz imi bu umessas !
Iqqen-as diɣ Ccix Σmer tinnes, inna-as :
Reẓm-i-t-tarbat, af-tt, a bu lmeɛna,
Tuwi-d aryaz, ineɣ wadda tt-yurun ?
Iwajeb-as Ccix Uɛesta, inna-as :
Nḍunna lmeɛna-nnun a bu tɣuni,
Afar ayd inna uryaz i lbeṣṣa !
Inna-as Ccix Σmer : "Max is ti-t-tuwey ? Hat inker-d awd netta g-gʷakal amm nettat uxla ! La Ur idd imki-nnaɣ !" Nnan-as ayt uɣejdim i Ccix Ɛmer : "Iwa ini !"
Irẓem Ccix Σmer taɣuni nna iqqen i Ccix Uɛesta, inna-as :
A wa, tirgax, a leḥdid, a k-yusin
Af a’ k-ibbey, a y aseklu bu umalu !

[@mohamedhaterbouch908]

Tanemmirt Monsieur Ali

[@INNAASCCIXAMER]

Je vous en prie, Monsieur Moha.

[@Tatfi-n-usara]

Tanemmirt kigan

[@INNAASCCIXAMER]

Ula maɣef.

[@amhalhamid9530]

Tanemmirt nnek kigan Mass Ali.

[@INNAASCCIXAMER]

Ula maɣef, a Mass Ḥamid.