Рет қаралды 420,738
Ұлттық бірыңғай тест артта қалып, мектеп бітірушілер соңғы кешті кеше облыс әкімдігі алдындағы алаңда өткізді. Оларға арнайы қызыл кілем төселіп, құттықтаулар айтылды. Шараға облыс әкімінің орынбасары Сара Нұрқатова қатысып, жаңа өмірге қадам басқан түлектерге ақ жол тіледі. Кейін ел мақтаған «Алтын белгі» иегерлеріне сыйлықтар табыс етілді. 159 түлек "Алтын белгі" иеленіп, екі бойжеткен көлік мінді. Мақсот Құсайынов атындағы Ақтөбе облыстық дарынды балаларға арналған мектеп-интернатының түлегі Жанар Болатова және "Сымбат" жеке мектебінің оқушысы Айдана Мұрат ұлттық бірыңғай тестте 124 балл жинап, өзгеден озып алға шықты. Сол үшін де оларға облыс әкімі атынан темір тұлпар берілді. Ал 123 балл жинаған екі түлекке планшет сыйға тарту етілді. Айта кетейік, облыс әкімдігі алдындағы алаңға жиналғандардың қуанышын тамашалауға ата-ана түгел жиналды. Олар қоршаудың әр жағында тұрып, алыстан концерт тамашалады. Бұған да риза. Себебі олар әрдайым балаларының тілегін тілейді.