أحسن تطبيق لتوجيه الضربة القاضية لمرض الإباحية

كيفاش نتخلصو من مرض الإباحية ؟
1- الوعي عن طريق القراءة و شحن الدماغ بالمزيد و المزيد من المعلومات المتعلقة بأضرار الإباحية، قداش ما وعيتي بالخطورة ديالها قداش ما بعدتي عليها، و هنا كا نصحك مجدد تقرا الكتاب لي ذكرت فبداية المقال، ديال " دماغك و الإباحية "
2- ممارسة الرياضة على الأقل ثلاث مرات في الأسبوع، و من الأحسن تنخارط فقاعة رياضية جماعية، لأن الرياضة الجماعية كا تبرعك فالدوبامين لي كا يغنيك على الرجوع للقاذورات المثيرة. الرياضية غا تنشط ليك الدورة الدموية، و غا تحفزك تخلق علاقات اجتماعية صحية، لي غا تسقي التربة الناشفة ديالك بالدوبامين الطبيعي الخالي من الميكروبات الإفتراضية.
3- الأكل الصحي و تجنب الوجبات السريعة، و الموناضا و ميلفوي و الفريت طاكوس و إخوانه من المأكولات الغنية بالسعرات الحرارية، لأنها هاد الماكلة ديال الزنقة حتى هي كا تعطيك كمية كبيرة من الدوبامين لي كا تخليك تحس بالقطعة، و تقدر فالوقيتة لي تكون فيها بوحدك فالدار تشهى طاكوس ، وتطفي الشهوة بمقطع إباحي، لأن بجوجهوم كا يقومو بنفس الدور.
4- إستغلال وسائل التواصل الإجتماعي في خلق علاقات اجتماعية حقيقية مع أصدقاء لي كا تجمعك معاهوم نفس الفلسفة و العقلية، و شخصيا الأغلبية ديال صحابي الحقيقيين لي كا نشرب معاهوم قهيوة حقيقية تعرفت عليهوم فالفيسبوك و الأنستغرام feynbert .
5- الخروج من القوقعة الإفتراضية إلى الطبيعة الأرضية، خرج تسارا فالطبيعي و ستنشق الهواء النقي و بعد على صداع و ضجيج و تلوث المدينة.
6- وضع أهدافك بورقة و ستيلو، و هادشي هضرت عليه قبل ثلاث سنوات فالسلسلة لي غيرات حياتي و حياة بزاف دالأصدقاء ديال غير حياتك بورقة و ستيلو، لأن النشوة و النزوة ديال الإباحية كا تجيك فنفس النهار لي كا تفيق و نتا ما عندك لا خطة لا والو، فكا تكون ضحية لخطة موقع إباحي فجر إنتباهك.
7- لغي المتابعة ديالك لجميع المؤثرات و المؤثرين لي كا يثيرو الشهوة ديالك بالجسد الجذاب ديالهوم، و حضي مزيان شنو كا يدخل فعينيك، لأن ديك الصور تقدر تحفز دماغك يطالب بالمزيد من الدوبامين لي ما عندكش بديل باش توفرو من غير الإباحية، وحتى إذا شتي شي جسد جذاب أو فورمة واعرة حاول الشوفة تكون خفيفة ضريفة ما طولش فيها و ما تتعمقش و تخليها تدخل لداخل، حاول تشوف و تخطف البصر ديالك، لأنهُ كاين فرق بين النظر و البصر، و هادشي علاش كا يقول الله سبحانهُ و تعالى فالقُرآن :
" قل للمؤمنين يغضوا من أبصارهم " و ما قالشي يغضو من أنظارهم
لأن البصر هو ملي كا تخلي الشوفة توصل للقلب و تحفز إفراز الدوبامين فالدماغ، أما النظر، فهو كا تشوف و ما كا تخليش النظرة تفوت عينيك، و كا تكون لا إرادية، ماشي بحال البصر لي كا يكون إرادي، و فنفس الوقت حاول تشغل البصر ديالك بالتبصر و ملاحظة جمال الطبيعة و جمال الأشياء لي ما كا تيرش الغريزة ديالك.
8- حاول تآنسطالي فروتينك اليومي عادة الكتابة، كتب على نهارك كيفاش داز، و على شنو تعلمتي فيه، و تكتب مخططاتك و طموحاتك فالحياة، و كل خطة حققتيها ترجع تكوشيها فالمذكرة، بهاد الطريقة غا تفرز الدوبامين بطريقة طبيعية فدماغك لي غا يغنيك على الاباحية.
9- مارس هواية الرسم، ما كا تعرفش تعلم ليه، تعلم العزف على آلة موسيقية، هادشي غا يعمر ليك نهارك، لأن أعظم أسباب الرجوع للبلية هو الفراغ، نفسك إن لم تشغلها بالحق، شغلتك بالباطل، دير أي حاجة مزيانة، لأن الدوبامين إذا ما فرزتيهش بطريقة صحية، غادي يتفرز بالطريقة الغير صحية لي راك عارفها.
10- ما فيها باس مرة مرة توقف و تاخد الكلمة أمام أفراد الأسرة و تقتارح عليهوم يبعدو عليهوم تلفوناتهوم، و يقربو من بعضياتهم، و علاش لا نقتارح عليهوم نخرجو نشربو قهيوة كاملين بلا تيليفونات و نتحاورو مع بعضياتنا و نتواصلو بطريقة صحية.
11- وهادي هي أعظم نصيحة، أحسن طريقة للتعلم هي التعليم
و أحسن طريقة لاكتساب عادة جديدة، هي تاخد بيد شي واحد يكتاسبها، و أحسن طريقة تبعد بيها على شي عادة خبيثة هي تاخد بيد صاحبك أو خوك الصغير يبعد عليها، هادي هي أنجع الطرق، ملي تشوف ناس كا تغير حياتهوم بسباب هضرتك أو كتابتك أ ونصائحك، الفرحة ما بحالها فرحة، و الدوبامين ما بحالو دوبامين، كا يغنيك على أنك ترجع للبلية.
12- محتمل واحد من أفراد الأسرة ديالك يكون كا يتفرج فالإباحية، ما تحرجوش، حاول ترمي ليه الميساج بطريقة غير مباشرة، و تخليه يقرا هادشي بلا ما يعيق أنك قصدتيه، لأننا مازال كا نحشمو من راسنا، و من حقيقتنا، و مازال مرض النرجسية خارج علينا، كا نبغيو نبانو خاليين من العيوب و الذنوب و السريرة ديالنا ما عالم بيها غير مولانا.
13- حاول تكون إنسان صالح، بانك تبارتاجي محتوى خاص بيك كا تقاسم فيه التجارب ديالك مع الأصدقاء و المتابعين ديالك على السوشل ميديا، بهاد الطريقة ملي تشوف المحتوى ديالك كا يستافدو منو ناس، و كا يخليو ليك تعاليق إيجابية، الدوبامين ما بحالو دوبامين غا يعنيك على الرجوع للعادة اللعينة.
14- نصيحة من عندك للإقلاع على البلية الخبيثة
خليها فالتعليق و غا نقراها بشغف و نكون ممتن ليك ساهمتي فإخراج ضحايا القاذورات من ظلمات الإباحية إلى أنوار الإيجابية.
15- أحسن تطبيق مجاني على الهاتف للإقلاع على الإباحية بارتاجيتو معاك فهاد الفيديو ، لي شرحت فيه كيفاش تخدمو، و كيفاش تستافد من المتابعة اليومية ديالو، غا نخلي رابط التحميل ديالو فأول تعليق.
16- دير فوكونط حفاظا على الخصوصية ديالك و على أدى لعنة آراء الآخرين و التنمر ديالهوم و دخل لأحسن مجموعة على فيسبوك لمحاربة الإباحية على الإطلاق : " واعي " و أيضا يمكن ليك تقلب على قناتهوم فاليوتيوب جد جد مفيدة " واعي "
17- شوف الفيديو ديال الصديق المتخصص في علم النفس ياسين الشرقاوي على موضوع الإباحية جد مفيد و لخص فيه معلومات جد مهمة.
رابط المقال كاملا على صفحتي بالفيسبوك
/ feynbert5
رابط تحميل تطبيق
play.google.co...

[@moughamiamine3558]

الحمدالله لست مدمنا بها والله الحمد كتيرا ولكن تابع محتواك رهيييب اكمل في نشر المعرفة♥️♥️👍👍

[@houssinehomma1264]

الحمد لله على نعمة الاسلام

[@anas-a7s]

الله يجازيك واصل محتوى هادف فيديوهات متعوب عليها إرتجالية غير مصطنعة يجعلني أشاهد فيديوهاتك واحدا تلو الأخر أتمنى أن تنشر فيديو عن طريقة التخطيط لتعلم شيئ جديد لأنني غالبا ما أبدأ في تعلم شيئ لكنني لا أواصل

[@جلالالدين-ج2ل6د]

شكرا جزيلا بارك الله فيك الله يرحم والديك

[@Eman3d802]

محتواك خطير والله

[@khadijaabojaber6444]

استمر محتوى جميل ♥️

[@Feynbert]

شكرا خديجة، الله يكبر بيك و يحفضك

[@khadijathebest8441]

أستاذ كنتمنى تقدم ليا شي نصيحة تلفت والله، أنا كنت دفعت للسنطر شعبة تسيير مقاولاتي ومن بعد فاش تقبلت فيخا بدلت الرأي ديالي وقررت ندفع لافاك في الدراسات الفرنسية ودابا بغيت نرجع للسنطر واش هي شعبة زوينة فيها افاق بغيت نديرها وخفت، وخفت كذلك ميقبلونيش وملقاش بلاصتي، مع العلم انا ادبية حرت بيناتهم شنو هي لي افضل ليا، جبت في الباك 16 دفعت لواحد المدرسة ديال الأساتذة ومتقبلتش فيها ومعرفتش علاش غانكون زكلت شي معلومة في السيت او الله اعلم كنتمنى تساعدني وشكرا لك مسبقا، في مدرستنا التوجيه مداروهش لينا وكانوكيجيبو لينا وسط الحصة وكيزرب علينا في ديك 10m ناقص بزااف

[@F____]

♨️ نصيحه من القلب ♨️ إلى أخواني و أخواتي في الله من اراد التعافي بعد الله سبحانه من العاده السريه و الأفلام الأباحيه يتابع قناه ( الحياه الطيبه ) و قناه ( واعي ) باليوتيوب . الله يعافي و يشفي كل شخص وقع بها . أسال الله لي و لكم التوفيق و النجاح بحياتكم و أن تكونو بسعاده و فرح دائمآ يارب العالمين . محبكم في الله .....⚘......

[@malaksoultana3991]

ربي يحفضك

[@yahiaroukaibi4044]

كنت شاهدتها واحد المرة ولقيت كيشوهوا صورة الإسلام من تما حقدت عليهم و كرهتهم

[@YoussefBahlaouen]

❤❤❤❤❤

[@mrali4345]

BIG BRO