Рет қаралды 2,467
ناصر الفراعنة...
...
يقول من قلبه تزايد هيامه
فوقه رحا بقعا تطاحن لواحيه
يا حافرٍ للكنز تسعين قامه
خذ كنزٍ اعظم منه واحفظ معانيه
خذ ما يفيدك في نهار القيامه
وتنزّحك من جور بقعا قوافيه
لا تصحب إلا كل راسٍ وهامه
والا الذنب يلقى شبيهٍ يخاويه
بجاحةٍ تلقى وراها سلامه
ولا حَياً جاب المطمّه براعيه
من لا يثمّن في المجالس كلامه
يطيح فيمن يصمخه لين يعميه
الطِيْب بَيّن والرخامه رخامه
والناس متساوين لولا المشاريه
والعلم لا جاء من كبير العمامه
كلًّ بدل ما في فمه قال لّبيه
الخبل دايم ما يردّه خطامه
والقرم ما يحتاج قرمٍ يوصّيه
من يحسبنّ الذيب مثل النعامه
لو يرمي طويقٍ بكبره بيخطيه
من لا يبدّي للنشامى سلامه
عَدّه والى مرّيت به لا تحيّيه
ما كلّ رَجّالٍ خواله عمامه
يقضي لزومٍ جيت تبغاه يقضيه
احدٍ مثل نور القمر في تمامه
واحدٍ ظلامٍ تايهٍ من يقدّيه
احدٍ حسامه ما ذبح له حمامه
واحدٍ حسامه فالمصايب ينجّيه
كم واحدٍ فالناس خانه حزامه
وجاه الفرج من واحدٍ كان شانيه
الناس تدمح كلّش إلا الكرامه
ولا فيه إناء إلا وينضح بما فيه
والشور في تركه دليل الغشامه
لا جاك شورٍ طيّبِ لا تخلّيه
من عاش بين الناس يبغى زعامه
حلو الكرى ما ذاقت العين حاليه
من لا تشيله في المواقف عظامه
ما شاف من عزًّ سوا اسمه وطاريه
احدٍ فعل كفّه يعلّي مقامه
واحدٍ مقامه فعل كفّه يردّيه
كثر الحذر ما فكّ ظبي العدامه
من صايبٍ بين القرون متمثنيه
حمر البقر ما سلّمته الضخامه
من ناب ليثٍ نشّبه في كلاويه
ولا نقّصت عمر العقاب القرامه
وفرخ القطا ما زاد عمره تتقّيه
ما اخبلْك يمبدّل شداده مسامه
وما ارْداك يملقّي رفيقه علابيه
من لا سقا نفسه ولا اسقا حيامه
ما احدٍ بمسقيها ولا احْدٍ بمسقيه
من يبذر المعروف عند الهلامه
غير الفلَس ما فيه شيٍّ بيجنيه
من ملّك المقرود مقضب زمامه
يصبر على ما يلحقه منه ويجيه
من لا يراعي من ضعيف ذمامه
يصبح ذمامه ما لقى اللي يراعيه
والناس يبن الناس لولا الملامه
ما شفت اخٍ منهم يسيّر على آخيه
ولولا الثنا ماتت علوم الشهامه
ولا شفت مَن خربق رصاصٍ ثناديه
من لا تصحّيه العِبَر من منامه
مصيبةٍ وحده طلاق انْ تصحّيه
بين البياضه دايمٍ والسحامه
مكانٍ اقشر جنّبه لا تجي فيه
العزّ شمسٍ والمذلّه عسامه
يكفيك من مي ازرق الجمّ صافيه
الصيرمي لا جاك زادك صرامة
والا الجبان يحطمنّك دواديه
بالك عن الهالك تنشّد علامه
وانشد عن الناجي وش اللي منجّيه
عزي لمن زاد اليتامي طعامه
يا ويله من الله بساعة يلاقيه
ان كان في بعض التعجل ندامه
كم فات رزقٍ صاحبه من تباطيه
ناسٍ تزيد اهل الفخامه فخامه
وناسٍ من تجيه متعلّي تدربيه
يا كَرشها والا الفقار وسنامه
قدرك وكلّ انسان قدره بأياديه
ايامنا بين العوض والغرامه
انسان تاخذ منه وانسان تعطيه
احدٍ بنى فوق الثريا خيامه
واحدٍ تحَت في سابع ارضٍ مبانيه
من لا يصلّي وش كسب من صيامه
إلا العطش يصلاه والجوع صاليه
كم من قزم زاده غروره قزامه
وكم محسنٍ زاد التواضع حسانيه
طيبٍ مع الخايب يزيده لئامه
وطيب مع الطيّب يزيد الوفا فيه
احدٍ على مَن جاه ماطر غمامه
واحدٍ على من جاه نارٍ تلاظيه
بيموت ما حقّق بيومٍ مرامه
من لا مشى في لازمه لين ينهيه
من لا يسنّ غلامه افسد غلامه
واليا كبر خيّب غلامه رجاويه
في الحكم رجّالٍ يحلّل حرامه
كافر ومن حرّم حلاله مساويه
من لا خلع عن وجه بقعا لثامه
قامت تشاوح به فنايع لياليه
خمسٍ من الاسلام تكمل لزامه
شهادتينٍ ثمْ صلاةٍ تذرّيه
ثم الزكاه تطهّره من أثامه
والرابع صيام رمضان ومواريه
حسب الأهله عند ربي نظامه
والحج عند الاستطاعه تؤدّيه
اليا زعل منك النذل في قمامه
واليا زعل طيّب فحقّه تراضيه
في الطيّبين من المراجل وسامه
في كل وجهٍ غيهب النور غاشيه
وفي الخايبين من الرخامه دمامه
في كل وجهٍ قارٍ اسود مغطّيه
الحرٍّ حرًّ واللمامه لمامه
الله يعين اللي من الناس قانيه
لعيون مجمولٍ يرودع وشامه
كم غاليٍ في الناس يبكيه غاليه
احدٍ قصر دون الطويله لجامه
واحدٍ وصل من كل علمٍ حراويه
احدٍ على السفلى هفا به فطامه
واحدٍ على العليا رقت به مجانيه
احدٍ على الماجوب جاله قوامه
كم من قعودٍ برّكه في صوانيه
واحدٍ عن الواجب ضرب له مهامه
يحتجّ بأدنى معذّره لا يسوّيه
ومن لا يحني دم الاعدا حسامه
والا بدمه سيف الاعدا تحنّيه
راح الشيوخ اهل السلف والجهامه
وجانا زمانٍ سابقاته مخازيه
في المجلس احدٍ كنّه ابو دلامه
واحدٍ رزينٍ كلمته ما توطّيه
من لا سرى في الليل خشية ظلامه
يجيه من سرّ الدهر ما يسرّيه
وعداد من حلوا قصور اليمامه
لا راح وفد جاك وفد متقفّيه
عودة حصا كشبٍ ورمل الثمامه
على احمد المختار طابت مساعيه
ازكى صلاة طيّبه في ختامه
ينهي بها شاعر مضر هيض خافيه
....
ناصر الفراعنة
شاعر مضر
فرعون الشعر
شاعر الثقلين
امبراطور الشعر
اسطورة الشعر
مارد الشعر