Рет қаралды 395
كلمات القصيدة
حتى تقصد العوينة عطشان وماتشربش عاد گول عليها واكحة
مابغيتش نكون نور مزور غي خليني كحل إلى كانت ظلمتي واضحة
الگلب قصر وخا الكسدة خربة يا الناوي تسكن يكون الصفا هو مفتاحك
غي دخل مرحبا قلوبنا دار كبيرة ماتحتاجش تجيب معاك متاعك
راني خيط من الحرير وخا نبان ليك حبل المشناقة
إلى طفيت ماشي لخاطري ظلمتي مابقات عندي ليها طاقة
حتى أنا بگلبي والرروح لي فيا خفيفة
راني حلال حرام عالعين لي تشوفني جيفة
كاين لي يكساب غي الهم وتنهيدة وقلب ضايق
خاضع الناس بالضحكة وحد بحزانو معايق
وشكون فيه يعطف حتى هو يولي من الناس
محتاج وسط الزحام اليد لي تخرجو من الدحاس
ماشي كاع لي رعات في الوسخ دبانة تقدر تكون ليام ضارت بالنحلة
إلى غابت الگمرة ماتلومش الليلة إلى دازت كحلة
شنو الفايدة الى الدات بالمظهر تشبع وتبقا العقول جيعانة
وشنو الفايدة إلى البحر ماه ماينفع الحوتة العطشانة
العين عشقات منظر لرض المزروعة ونسات تشوف شنو تمارها
ملي حتى نتا من الناس حرام عليك عليهم تحكم ونتا معارفش قدارها
سلم على الروح حط يدك على الجرح ودهنو بكلمة زينة
ماشي خاطر لمراض راه قالو كون لقينا دوانا كون برينا
شحال من فارس بغا يركب عاليام ومابغاتش تحنيلو
عطاها كاع لي فجهدو ومزال طامعة تديلو
عذر المبلي يالمعفي من البلا ونطق حروف شافية
العود الخضر لي ولا جمرة راه غير ضحية العافية
شهاد الزمان الي تكساب خنز الدنيا تعيش نقي
الراس الكحل ملهوف شنو غايزرع ومضارب حساب بشنو غايسقي
غي حط الهم يالي يدك في الدنيا قصيرة
إلى عين الخلق عليك طافية عين الخالق فيك بصيرة
حسنو عوان لي روحو هربات على الكسدة
في قلبو تقبة تنزف ومعارف باش يسدها
الدنيا وحدة والعيشة تختالف كلو وبليتو
لي حگر الحفيان ضور ليام وتقطع نعالتو
راني ندوي بلسان لي كاتمها في قلبو ومقادر يگول عيت
ماعدروه الناس مارحماتو نفسو لوتاتو ليام لي عاشها خزيت
انا غير شاعر والشاعر كايسرق لي في قلب الناس بلاما يتخبع
كلنا ضعاف في الدنيا حتى ملك مايبقا على عرش القوة متربع
حسابي على الفيس بوك
/ mounsif.asekary
#الزجل #الصلام#الشعر #المغرب