GYM: Albert Guðmundsson

GYM E04 S01
„Þetta er fokking erfitt. Þú þarft að leggja allt á þig." segir Albert Guðmundsson, landsliðsmaður í fótbolta.
Albert er yngsti leikmaður til þess að spila á HM í knattspyrnu fyrir Íslands hönd. Það mætti segja að hann sé með fótboltann í blóðinu - en foreldrar hann eru bæði fyrrverandi knattspyrnumenn. Þess má einnig geta að afi hans og nafni, Albert Guðmundsson, var fyrsti atvinnumaður í fótbolta á Íslandi og spilaði m.a. fyrir Arsenal og A.C. Milan.
Þegar Albert lauk grunnskóla fór hann í atvinnumennsku hjá hollenska liðinu Heerenveen. Á þeim fimm árum sem hann hefur verið í Hollandi hefur hann spilað með þremur liðum, og segir hann atvinnumennskuna ekki alltaf dans á rósum. Þrátt fyrir að hann sé að elta drauminn segir hann ýmsar fórnir fylgja - til dæmis tíða fjarveru frá fjölskyldu og vinum.
Hann ræðir boltann, rútínuna, HM og fleira í nýjasta þætti af GYM með Birnu Maríu. Þættirnir eru unnir í samstarfi við World Class, GOGO, Nike & NOW.