Рет қаралды 191
Бүгүн, оруобуна кини төрөөбүтэ 107 сыла туолар бэлиэ күнэ. Дэгэрэҥ ырыаны толорооччулар күөн күрэс Христофор Максимов дойдутугар Сулҕаччыга ыытыллара бу нэһилиэстибэ сүппэтин, саҥа куоластарынан байан, хаҥаан иһэрин туоһута. Биһиги нэһилиэк баай историябытын оҥорбут, уһансыбыт чулуу дьоммут көмүс ааттарын үйэтитиигэ үлэбит биир улахан салаата бу Христофор Трофимович Максимов айар үлэтэ буолар. Ол курдук кини аатынан саха ырыатын сайдыытын өйүүр араас тэрээһиннэр ыытыллаллар - олор истэригэр өрөспүүбүлүкэтээҕи ырыа ыһыахтара, кини аатынан араас таһымнаах тэрээһиннэргэ кыттыы, оҕону, ыччаты саха ырыатыгар, тойугар уһуйуу. Бу барыта кырдьык баай нэһилиэстибэни кэҥэтэр, үйэттэн үйэҕэ тарҕатар.
Кыырай күөх халлааҥҥа Христофор Максимов дэгэрэҥэ эйэлээх олоҕу тутуу сүүрэр тэтимин кытта тэҥҥэ дьиэрэйбитэ. Ырыатыгар боростуой үлэһит дьон, кинилэр үлэҕэ кыайыылара, ыраас тапталлара хоһуйуллар. Ол иһин кинилэр уһун үйэлээхтэр, кини баҕарбыт баҕатын толорон - билиҥҥи ыччат күннэтэ ыллыыр. Киристэпиэр дэгэрэҥэ күн бүгүн алаастарынан, сыһыыларынан сыспай сиэллээх сэлиитинэн дьиэрэйэн иһиллэр.