HULING SAYAW NI CARMEN VERGARA SA GOBYERNO

Minamahal kong mga kababayan, mga kasamahan sa paglilingkod, at sa lahat ng naging bahagi ng aking panunungkulan, isang mapait ngunit matapat na pagpapahayag ang nais kong iparating sa inyo ngayong araw.
Sa pagwawakas ng aking termino bilang inyong pinuno, hindi lang isang posisyon ang aking nililisan, kundi isang pangarap na unti-unting nawasak ng katiwalian, kasakiman, at kawalan ng tunay na malasakit para sa bayan. Ginusto kong maging ilaw sa dilim, subalit paano mo papatayin ang kadiliman kung ang paligid mo mismo ay kumakain ng liwanag?
Sinubukan kong ipaglaban ang tama. Lumaban ako. Pinanghawakan ko ang prinsipyo na sa paglilingkod ay kailangang inuuna ang kapakanan ng tao bago ang sariling interes. Subalit ang sistemang matagal nang nabahiran ng dungis ay tila naging isang pader na hindi ko kayang gibain nang mag-isa.
Mga alkalde, mga opisyal ng gobyerno-marami sa kanila ang nabubuhay sa kasinungalingan, nakikisalo sa yaman ng bayan habang ang mga tunay na nagdurusa ay ang mga nasa laylayan. Paulit-ulit akong nakipagbuno sa katiwalian, sa pang-aabuso, at sa kawalan ng hustisya, ngunit sa bawat hakbang na aking ginawa, isa, dalawa, tatlong hakbang din ang inilalayo ng mga may kapangyarihan upang manatili sila sa kanilang trono.
Ngayon, sa aking pagreretiro sa gobyerno, hindi ito dahil sa pagkatalo kundi isang pagpili na mamuhay nang may katahimikan. Nawalan na ako ng pag-asa sa sistemang ito, sa mga pangakong walang laman, sa mundong hindi ko na makilala. Ang henerasyon ngayon ay iba na-hindi na ito ang mundong aking pinangarap, hindi na ito ang bayang inakala kong maililigtas.
Minahal ko ang aking tungkulin. Ibinuhos ko ang lahat-dugo, pawis, oras, at kahit ang aking paniniwala na may pag-asa pang magbago ang sistema. Ngunit ngayong ako'y lumilingon sa aking likuran, napagtanto kong ang laban ay hindi ko na kayang ipagpatuloy nang mag-isa.
Sa inyo, aking mga kababayan, nawa’y patuloy kayong maghangad ng tunay na pagbabago. Hindi ko man ito nasaksihan sa aking panahon, umaasa pa rin akong sa darating na mga araw, sa bagong henerasyon, may isa o ilan sa inyo ang magpapasyang ipagpatuloy ang laban na aking sinimulan.
Paalam, at salamat sa pagkakataong minsan ay naging tinig ako ng bayan.
Salamat Bayang Sinilangan, CONSUMATUM EST!
Carmen Vergara
#bayangsinilangan #reddeadredemption2 #reddeadredemption #rdr2