Рет қаралды 14,235
Алматыда жантүршігерлік жол апатынан 21 адам жарақат алып, 1 кісі оқиға орнында қайтыс болды. Жоғары жылдамдықпен жүйткіп келген қоғамдық көлік екінші автобустың бүйірінен соғып, жолдан шығарып жіберген. Сұмдық оқиғаның куәгерлері, соққан автобус тіпті тежегішін басқан жоқ деп отыр. Қазір орташа зардап шеккен 9 азамат ауруханада ем қабылдап жатыр. Олардың ішінде 3 сынып оқушысы да бар.
Бұл Төле би мен Абылай хан көшелерінің қиылысында болған апаттың бейнежазбасы. Онда жоғары жылдамдықпен жүйткіп келген қоғамдық көліктің екінші автобусты бүйірінен соққан сәті анық түсіп қалған.
Сұмдық апат салдарынан 21 кісі түрлі дене жарақаттарын алыпты. Қазір зардап шеккен жолаушылардың тоғызы аурухана ем қабылдап жатыр. Ең кішісі небәрі тоғыз-ақ жаста. Оқушының миы шайқалып, маңдайы жарылған. Ал бір кісі жедел жәрдем келгенше оқиға орнында қайтыс болған. Куәгерлердің айтуынша, соққан автобус тіпті тежегішін де баспапты.
ИГОРЬ САТПЕНКО, куәгер:
- Мен Төле би көшесінің бойында тұрдым. 201 автобус Төле бимен жүреді. Ал екіншісі Абылай ханның бойымен жоғары көтеріліп бара жатқан. Міне, сол 201 автобус тіпті тежегішін баспады. Тоқтаған жоқ. Сол жылдамдықпен кеп соқты да жолдан шығып кетті. Мұнда жолды кесіп өтпек болып екі адам тұрған. Соларды қақты. Мен оның аялдамаға тоқтағанын да көрмедім.
СЕРІК ТӨЛЕУОВ, куәгер:
- Мен Қазпоштаның жанында келе жатқанмын. Қатты дауыс естідім. Сөйтіп, самокатымды тастап осында жүгіріп келдім. Сол сәтте жедел жәрдем де келіп, зардап шеккендерді алып шыға бастады.
Ал бұл кадрларда есеңгіреп отырған бірнеше жолаушыға маңайындағы кісілер көмектесіп жатқаны түсірілген. Бірінің басын толық таңып тастағаны да байқалады. Мұнда құтқарушылар автобустың астына үңіліп, әлдекімді шығаруға әрекет етіп жатыр. Куәгерлер де бірден соқтығысқан қоғамдық көліктерге қарай жүгірдік деп отыр. Әкімдік өкілдері болса, әлі апаттың мән-жайы анықтап үлгермеген.
СЫМБАТ МЫРЗАҒҰЛОВ, қалалық Мобильділік басқармасы басшысының орынбасары:
- 98 бағытта қатынайтын қоғамдық көлік «Сити бас» атты жекеменшік тасымалдаушы компанияға тиесілі. Ал 201 бағытта қатынайтыны «Алматы трансқа» қарайды. Яғни, біздің тасымалдаушы. Қазір апаттың себебі анықталып жатыр. Қосымша ақпаратты кейінірек хабарлаймыз.
Алматы қалалық полиция департаментінің өкілдері бұл дерекке қатысты көлік құралдарын басқару кезінде абайсызда кісі өліміне әкеп соққан іс-әрекеттер бабы бойынша сотқа дейінгі тергеу басталғанын айтты. Жалпы Алматыға қар түссе болды, бірнеше сағатқа созылатын кептеліс, жол көлік оқиғалары күрт көбейіп кететіні жасырын емес. Міне, бүгінде жаңбыр арты қарға ұласып, орталық көшелерде 10 балдық кептеліс тіркеліп отыр.
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Алматы #қақтығыс #қайғылы_жағдай