Karem Bak Famli

Yia 2022 hemi no bin wan isi yia blong fulap papa mo mama long Vanuatu from impak blong COVID 19 long famli. Plante papa mo mama oli lusum wok mo fulap oli fos blong wok long haos mo semtaem lukaot long ol pikinini. Long ol taem blong emejensi mo disasta, wetem fulap stress, fraet mo wari we hemi stap ko raon, hemi isi nomo blong ol papa, mama mo ol nara memba blong famli oli tritim nogud ol pikinini. Vaelens mo abius long ol pikinini isave ko antap insaed long wan wan haos. Ol taem blong lafet olsem Chrismas hemi ol taem tu we ol pikinini oli save fesem vaelens. Wetem sapot blong gavaman blong Ostrelia mo tru long Australian Humanitarian Partnership, World Vision Vanuatu hemi raetem wan stori buk blong helpem ol papa mo mama wetem sam gudfala fasin long hao oli save lukaotem gud ol pikinini. Stori buk ya hemi abaot wan papa we hemi spendem taem wetem ol pikinini blong hem blong lisen, kivim kamfot mo mekem ol samting tugeta wetem olgeta. World Vision Vanuatu hemi wantem enkarejem ol papa mo mama mo yumi evriwan long Vanuatu blong lukaotem gud ol pikinini long festive season ya.