Рет қаралды 81,993
#جوان_وش_السلندر
#أفكار_جديدة_جدا
#سيارات
جوان وش السلندر
هنتكلم النهار ده عن اعراض تلف جوان وش السلندر
معاكم هاني من قناة افكار جديده جدا
جوان وش السلندر
هو الخط الفاصل بين دورة الزيت ودورة الميه داخل الموتور ومع اي تهتك في جزء منه بيحصل خلط بين الزيت والميه وكمان ممكن يحصل خلط بين الميه وخليط الوقود داخل غرف الحرق وده له أعراض تانية هنشوفها مع بعض وسط كل اعراض تلف جوان وش السلندر
ايه هي بقى الاعراض دي كلها
اولا
نطر الميه من الردياتير او القربة لمجرد تشغيل المحرك وهو بارد وغطا الردياتير مفتوح
ثانيا ظهور فقاقيع هوا كتيرة غير متناهية او محدودة خارجة من فوهة الردياتير خاصة مع زيادة سرعة المحرك، او لما تزود بنزين
تالت عرض هو ظهور زيت عائم على وش الميه في الردياتير او القربة
العرض الرابع نقص ميه التبريد بدون وجود أي تسريب من الخراطيم او من اي مكان تاني.
العرض الخامس خروج ميه من الشكمان طول فترة تشغيل العربية اي وقت صيف أو شتا صبح. ليل طول اليوم بيخرج ميه وبكميات كبيىة.
العرض السادس وجود صدا على واحد او اكتر من البوجيهات من الداخل لما تفكهم الأربعة هتلاقي صدا من الجزء الداخلي للبوجيه لان الميه بتدخل غرف الحرق طول الوقت.
سابع عرض وجود صدا داخل غرف الحرق نفسها لما تبص فيها بكشاف والبوجيهات مفكوكة.
العرض التامن هو وجود طحينة على الزيت أو الميه، الميه والزيت عموما لا يختلطان لكن مع التسخين بيحصل بينهم تجانس وبيتحول لمركب شبه الطحينة كده
العرض التاسع ارتفاع درجة حرارة الموتور مع علاج كل الأسباب والتأكد من عدم وجود سبب حقيقي اخر للحرارة
في اعراض من ضمن الاعراض دي لمجرد وجودها يأكدلك ان عندك مشكلة في جوان وش السلندر، زي نطر الميه مع الدوارة، وخروج ميه بكمية كبيرة طول الوقت من الشكمان وزي وجود طحينة في الزيت او الردياتير وفي اعراض تانية غير كافية لتشخيص العطل زي ارتفاع الحرارة ونقص ميه التبريد ووجود فقاقيع هوا على فوهة الردياتير.... وكده نكون وصلنا لنهاية حلقتنا